10/12/2013 17:55:16

Banorët kundër privatëve: na shkatërruan rrugën !

Banorët ndodhen të izoluar për shkak të shkatërrimit të rrugës nga kalimi i automjeteve të rënda të kompanive të naftës

FIER - Kompania Bankers është ballafaquar sërish me protesta të banorëve. Këtë herë kanë qënë banorët e fshatit Kallëm, në komunën Mbrostar, 3 km në veri të qytetit të Fierit, që kanë protestuar, duke bllokuar aksin rrugor që lidh fshatin e tyre me qendrat e tjera të banuara dhe me autostradën Fier-Lushnje.

Banorët pretendojnë se ndodhen të izoluar për shkak të shkatërrimit të rrugës nga kalimi i automjeteve të rënda të kompanive të naftës që operojnë në fushën naftëmbajtëse të Marinzës.

Ata kërkojnë rikonstruksionin e menjëhershëm të rrugës, pasi në rast të kundërt paralajmërojnë se do të bllokojnë rrugët dhe nuk do t’i lejojnë mjetet e kompanisë Bankers që të qarkullojnë.

“Rruga është shkatërruar dhe na ka izoluar nga qendrat urbane. Kompanitë e naftës duhet të zbatojnë rregulloren dhe kriteret e përdoruesit të rrugës, pasi kjo rrugë nuk mund të përballojë dot ngarkesa të një tonazhi të tillë”, shprehet V.Hila, fermer.

Kryetari i komunës, Gëzim Dhima, e pranon situatën dhe duke iu bashkangjitur shqetësimit të qytetarëve, i kërkoi kompanisë “Bankers” dhe kompanive nënkontaktuese që të zbatojnë detyrimet kontratuale, lidhur me ruajtjen dhe mirëmbajtjen e infrastrukturës dhe mjediisit.

“Kompania duhet të fillojë rikonstruksionin e rrugës, pasi në të kundërt ne nuk do të lejojmë përdorimin nga ana e e këtij segmenti rrugor nga ana e saj”, ka thënë Dhima. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin