10/12/2013 13:46:25

Ndahet nga jeta gazetari Tomor Jolldashi

I qetë, i pabujë, ai nxori në dritë problemet e shumta të shoqërisë shqiptare si një analist i spikatur, kritik dhe i papajtueshëm

ELBASAN - Një sëmundje e rëndë ndau nga jeta gazetarin e njohur elbasanas, Tomorr Jolldashin. “Do të na mungojë gazeta e tij brilante ”Elbasani”, që Tomorri botonte prej gati 20 vjetësh, më jetëgjata ndër gazetat lokale në Shqipëri. Penda e tij e mprehtë e kritike, depërtoi në të gjitha skutat pa dallime preferencash politike dhe interesi”, thotë miku e kolegu i tij, Taulant Ceka.

I qetë, i pabujë, ai nxori në dritë problemet e shumta të shoqërisë shqiptare si një analist i spikatur, kritik dhe i papajtueshëm. “Ai mbeti një bashkëudhëtar i ngushtë i proceseve demokratike dhe si kryeredektar i gazetës "Fjala e lirë" dhe si botues i gazetës “Elbasani”, shton Ceka, sipas te cilit, për 35 vjet në mjedisin e gazetarisë shqiptare ai është përfaqesuesi më i denjë i gazetarisë elbasanase.

Tomorr Jolldashi lindi në Elbasan në vitin 1946 në familjen e Shefki dhe Ismete Jolldashi, një familje me traditë qytetare, që i dha Elbasanit pedagogë, sportistë, mesuesë dhe drejtues të respektuar.

Ne vitin 1966 nisi studimet e larta në Universitetin e Tiranës në degën e Gazetarisë, ku do të spikase talenti i tij në këtë fushë por edhe në letërsi. Në këto kohë boton tregimet e para te faqja letrare e "Zërit të Rinisë". Në vitin 1970 Tomorr Jolldashi emërohet gazetar në redaksine e gazetës "Bashkimi" një nga dy organet më të rëndësishëm të shtypit shqiptar të asaj kohe.

Janë të shumta problemet e mprehta, analizat dhe reportazhet që përcolli te lexuesi. “ Nuk ka krahinë të Shqipërisë ku nuk shkeli gazetari i talentuar, duke krijuar një personalitet të spikatur si gazetar i guximshëm, kritik dhe analist i problemeve të mprehta. Koleget e tij Arshin Xhezo, Mitro Cela, Filip Cakulli, Qemal Sakajeva, Frrok Cupi, Shefki Karadaku do ta vlerësojnë për kurajon dhe talentin.

Proceset demokratike e gjejnë Tomorrin në Elbasanin e tij ku themelon shtypin demokratit në fillim si drejtues i gazetës pluraliste të rrethit "Fjala e lire" dhe më pas botues i gazetës "Elbasani", e cila gati 20 vjet ka qenë shoqëruese e pandërprerë, pasqyrë e gjallë e tranzicionit në qarkun dhe si e ka quajtur një koleg gazetar "Fakulteti joinstitucional i gazetarisë elbasanase", shton Ceka në kujtim të Tomorr Joldashit. Aktori i urtë dhe hokatar, Selman Biza, eshte shprehur: “Nëse dikush lufton të jetë një gonxhe, Tomorri është një bahce. Lamtumirë mësuesi dhe kolegu ynë Tomorr Jolldashi". Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin