09/12/2013 15:56:03

Bllokohen 18 dyqane mishi

AKU 'Nuk plotesojne standartet e sigurise'

ELBASAN- Inspektorë të Autoritetit Kombëtar të Ushqimit kanë bllokuar 18 dyqane të tregimit të mishit si edhe kanë asgjësuar disa ton ushqime të skaduara, në kuadër të një aksioni të ndërmarrë prej disa ditësh në qarkun e Elbasanit.

Aksioni nisi në kuadër të Task Forcës Kombëtare të përbërë nga përfaqësues të AKU-së në Elbasan, institucioneve të tjera vendore, si policia, Drejtoria Rajonale e Tatimeve, Drejtoria e Higjienës, Agjencia Rajonale e Mjedisit dhe përfaqësues të Drejtorisë së Përgjithshme të Autoritetit Kombëtar të Ushqimit.

Drejtori i AKU-së, Zenun Bullari, thotë se "vetëm gjatë këtyre pesë ditëve të fundit si rezultat i kontrolleve të kryera në 62 subjekte u mbyllën 18 dyqane të tregtimit të mishit. Nga aksionet e Task Force u sekuestruan edhe 108 kilogramë mish , 16 kg peshk, 57 kilogramë qofte dhe 20 kg sallam, të cilat ishin bërë gati për tregtim pa dokumentet e origjinës, pa etiketë dhe fletën shoqëruese të analizave".

Ky inspektoriat ka vendosur dhe gjoba në 10 subjekte me vlerë 50 mijë lekë dhe 100 mijë lekë. Dyqanet e tregtimit të mishit, të cilat u bllokuan nga Autoriteti Kombëtar i Ushqimit, nuk plotësonin kushtet higjieno-sanitare, si dhe kishin mungesa të tjera, siç është ajo e dhomave frigoriferike, apo edhe problem me dokumentacionin.

Drejtori i AKU-së shton se "asnjë subjekt që shkel rregullat dhe nuk plotëson kushtet nuk do të tolerohet, ndërsa kontrollet dhe inspektimet do të jenë të rrepta e sistematike", ndërsa shton se "do të merren masa për tregtarët ambulantë që tregtojnë mishin në mënyrë të paligjshme".
Na ndiqni dhe në Facebook dhe Twitter

Dërgo me email | Stampo artikullin