08/12/2013 12:57:19

Identifikohen 2 viktimat shqiptare

U vrane ne kufiri nga policia greke

KORCE- Dy shtetasit shqiptarë që humbën jetën pas një shkëmbimi zjarri në vendin e quajtur Vrondero, 2 km larg Prespës së Vogël, pranë kufirit shqiptaro-grek, në orët e para të mëngjesit të sotëm në “piramidën 1920”, janë vëllezërit Melsi dhe Elvis Çollaku nga fshati Shuec i Devollit, në juglindje të vendit.

Drejtori i Policisë së qarkut Korçë, Edmond Tarkaj, bëri të ditur se shtetasit që kanë humbur jetën janë identifikuar nga familjarët e tyre. Ata janë , Melsi dhe Elvis Çollaku me origjinë nga Devolli, ndërsa shtoi se po punohet për të zbardhur dinamikën e plotë të ngjarjes.

Sipas Tarkaj, informacionet nga policia greke bëjnë të ditur se, nga përleshja ka mbetur i plagosur një oficer i policisë greke, i cili ka ndërruar jetë gjatë transportit për ti dhënë ndihmë mjeksore.

Rreth orës 1:30 pas mesnate, patrulla e policisë greke po kryente një kontroll për peshkimin e paligjshëm, dhe dy nga policët kanë hyrë për të kontrolluar kasollen ku ndodheshin dy vëllezërit, 2 km larg liqenit të Prespës. Ndërkohë mësohet se polici i tretë ka qëndruar për t’iu mbuluar krahët, dy kolegëve të tij .

Në momentin kur policët i janë afruar kasolles, një nga shqiptarët ka hapur zjarr me kallashnikov në drejtim të patrullës së policisë. Nga shkëmbimi i zjarrit kanë mbetur të vdekur dy vëllezërit, shtetas shqiptar si dhe oficeri grek. Gjatë kontrollit të ushtruar në kasollen e tyre, u gjetën një automatik, por jo drogë, sikurse u dyshua në fillim.

Dyshohet se shqiptarët kishin hyrë në tokën greke për peshkim të paligjshëm në liqenin e Prespës. Po punohet për zbardhjen e plotë të rrethanave të kësaj ngjarjeje.
Na ndiqni dhe në Facebook dhe Twitter

HermesNews-©2013

Dërgo me email | Stampo artikullin