06/12/2013 16:30:19

Zharrëz, këshilltarët vazhdojnë grevën

''Ne do të vazhdojmë rrugën drejt vletëflijimit deri sa qeveria të na japë garanci për zgjidhjen e problemit''

FIER - Këshilltarët e komunës Zharrëz ne rrethin e Fierit janë shprehur të vendosur në vazhdimin e grevës së urisë deri në plotësimin e kërkesave të tyre. "Ne do të vazhdojmë rrugën drejt vletëflijimit deri sa qeveria të na japë garanci për zgjidhjen e problemit dhe kompania kanadeze e naftës ”Bankers Petrolium” të respektojë standardet e mbrojtjes së mjedisit dhe jetës së komunitetit”, shprehen ata.

"Ashtu si dhe e kishim deklaruar, ne u futëm në grevë urie pas skadimit të afatit që i lamë qeverisë dhe kompanisë Bankers për t'u ulur në tryezën e bisedimeve", u shpreh kryetari i këshillit të komunës, Dylber Karafili. “Ne jemi të vendosur në qëndrimin tonë, pasi nuk mund të bëhemi dëshmitare të një katastrofe kolektive që po i shkakton kompania Bankers zonës naftëmbajtëse”, tha ai.

“Banorët janë të traumatizuar. Ata nuk janë më të sigurtë në shtëpitë e tyre, rrojnë me ankth dhe i gjithë ky tmerr dhe ankth ka një emër, një shkaktar, ”Bankers Petrolium”, thote një tjetër grevist, Kastriot Lisi, ish-specialist nafte. Ai akuzon kompaninë kanadeze se po shfrytëzon në mënyrë barbare shtresat dhe nënshtresat e puseve, duke e shndërruar zonën naftëmbajtëse në një minë me sahat.

“Unë kam punuar si specialist nafte dhe e njoh mirë këtë proces. Lëkundjet sizmike të tokëst në këtë zonë janë pasojë jo e dukurive natyrore, por të shkaktuara artificialisht, si rezultat i proceseve teknologjike që aplikon Bankersi”, u shpreh Lisi. Sipas tij,qeveria duhet të detyrojë kompaninë kanadeze të zbatojë legjislacionin shqiptar dhe atë ndërkombëtar për standardet e shfrytëzimit teknik të puseve, ose ta largojë dhe padisë atë. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin