04/12/2013 16:33:16

Jepen detajet e vrasjes se te riut

Ministria e Brendshme publikon informacionet

TIRANE- Ministria e Brendshme jep detaje mbi ngjarjen e rëndë të ndodhur në ambientet e një shkolle profesionale në Shkozet të Durrësit, ku një 15 vjeçar u vra nga një bashkëmoshatar i tij.

Ministri e Brendshme bën të ditur se paraditen e sotme, "se nëpërmjet një telefonate u mor njoftimi në Sallën Operative të DPQ Durrës, për të shtëna me armë zjarri në shkollën e mesme profesionale “Beqir Çela” në Shkozet".

Në mënyrë të menjëhershme drejt vendit të ngjarjes janë nisur 3 patrulla policore. Në orën 09.55 punonjësi i Policisë së Zonës konfirmoi se në ambientet e kësaj shkolle kishte ndodhur një vrasje, viktimë e së cilës mbeti shtetasi A.T., 16 vjeç, banues në fshatin Vadardhë, Durrës, nxënës i vitit të dytë.

Në vendngjarje u dërguan Grupi Hetimor, i cili kreu veprimet e para nën drejtimin e Prokurorisë së Rrethit Durrës. Ndërkohë për hetimin e gjerë të ngjarjes u përfshinë specialistë nga disa struktura të Policisë së Durrësit.

Nga hetimet e deritanishme rezulton se autor i kësaj ngjarje është shtetasi E.V., 15 vjeç, banues në fshatin Xhafzotaj, nxënës i vitit të parë të kësaj shkolle të mesme. Rezulton se ngjarja ka ndodhur në ambientet e ofiçinës së shkollës. Dy klasat respektive të nxënësve të përfshirë në ngjarje, po zhvillonin praktikën mësimore në atë moment.

Në vendin e ngjarjes u bllokua arma e zjarrit, e cila kishte reduktim në disa pjesë të saj (që shërbenin për zvogëlimin e përmasave fizike të armës). Aktualisht po punohet me intensitet në dy drejtime: për kapjen e autorit të dyshuar të ngjarjes si dhe saktësimin e motiveve dhe mekanizmit të plotë të kësaj ngjarje.
Na ndiqni dhe në Facebook dhe Twitter

HermesNews-©2013

Dërgo me email | Stampo artikullin