03/12/2013 16:24:01

Ulen depozitat dhe kreditë

Në krahasim me fundin e 2012-s kursimet në total janë rritur me rreth 18 miliardë lekë

TIRANE - Paniku i krizës ekonomike globale reflektoi tkurrjen e totalit të depozitave dhe kredisë në fund të muajit tetor, bëri të ditur Banka e Shqipërisë.

Sipas statistikave totali i depozitave në sistemin bankar arriti në gati 949 miliardë lekë në fund të muajit tetor, rënë me 0.7%, apo rreth 7.1 miliardë lekë në raport me një muaj më pare, duke shënuar rënien më të lartë mujore që nga shkurti 2009.

Kjo tendencë vjen pasi në muajt gusht-shtator, si depozitat e korporatave në valutë, ashtu dhe ato të individëve, panë një zgjerim të ndjeshëm në shtator, ndryshe nga periudha janar-korrik, kur kursimet në valutë shfaqën një tendencë konstante rënieje.

E ndjeshme ishte kjo rënie, sidomos në periudhën rreth zgjedhjeve, ku gjatë muajve prill-korrik u larguan nga bankat rreth 130 milionë euro. Në krahasim me fundin e 2012-s kursimet në total janë rritur me rreth 18 miliardë lekë, apo 1.9%, tërësisht si rrjedhojë e shtimit të depozitave në lekë, ndërsa ato në valutë janë tkurrur me rreth 3.3 miliardë lekë. Ndikimin kryesor në ngadalësimin e depozitave e ka dhënë ulja e kursimeve në valutë. Me bazë vjetore ato janë reduktuar me 3.2%, apo 15 miliardë lekë.

Kursimet në monedhën vendase janë shtuar me 31 miliardë lekë për të njëjtën periudhë. Ecuri negative, statistikat tregojnë edhe për kreditimin. Arsyet e kreditimit të ulët lidhen si me kërkesën e dobët të biznesit, që ka frenuar investimet, ashtu dhe nga shtrëngimi i standardeve të kreditimit nga bankat. Kjo e fundit duket të jetë më e fortë se rënia e kërkesës, teksa Banka e Shqipërisë ka pranuar se tkurrja e huasë nga bankat po ndikon në lulëzimin e kredisë informale.

Ndërkohë, bankat kanë filluar muajt e fundit pastrimin e bilanceve të bankave nga kreditë e këqija, veprim që ka ndikuar si në daljen e sistemit me humbje për herë të parë në një dekadë, ashtu dhe në rënien e stokut të kredisë dhe në shtimin e huave të humbura në sistem.

Gjithsesi, Banka e Shqipërisë e vlerëson pozitiv këtë proces, pavarësisht efekteve afatshkurtra që po jep në treguesit e huasë. Totali i kredisë për ekonominë në fund të muajit tetor arriti në 540 miliardë lekë, duke shënuar rënie me 1.3%, apo rreth 7.4 miliardë lekë, në raport me një muaj më parë. Tkurrja ka ardhur nga rënia e huasë për korporatat e tjera jo financiare, si në lekë, ashtu dhe në valutë.

Pas tkurrjes së huasë në korrik, me rreth 9 miliardë lekë me bazë mujore, tetori është muaji i dytë me rënien më të lartë përgjatë 2013-s. Në krahasim me fundin e vitit 2012, huaja për ekonominë është tkurrur me 2.7%, apo rreth 15 miliardë lekë. Një vit më parë, ndryshimet përkatëse ishin plus 2% dhe 10 miliardë lekë. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin