03/12/2013 15:29:54

Kreu i KDsë pa kandidaturë

Javën tjetër komisioni i medias nis seancat dëgjimore për kandidatët

TIRANË - Nënkryetari i komisionit parlamentar të medias, deputeti i PS-së, Alfred Peza vlerësoi të martën profesionalizmin dhe integritetin e kandidaturave të paraqitura për anëtar të Këshillit Drejtues të RTSH-së, duke pohuar vështirësinë në përzgjedhjen e tyre.

Javën e ardhshme komisioni i medias nis seancat dëgjimore për të kuptuar vizionin e secilit kandidat, në mënyrë që të shkohet drejt një përzgjedhje sa më profesionale për të gjetur individët me më shumë integritet, profesionalizëm dhe sa më të denjë për atë vend të rëndësishëm.

Nga 64 kandidatë që kanë depozituar dokumentet në komision do të shqyrtohen 55 prej tyre, pasi pjesa tjetër nuk i kanë respektuar afatet kohore të dorëzimit. "Ne do të shqyrtojmë 55 kandidatura për 10 emra", tha Peza.

I pyetur se sa do të jetë numri i kandidatëve për kryetar të Këshillit, nënkryetari i komisionit tha se për këtë nuk ka një numër të caktuar. "Nuk ka një limit për këtë. Por ka pasur një problem se për kryetarin e KD-së nuk është paraqitur ashnjë kandidaturë, pasi kjo ndoshta nuk është kuptuar apo ndoshta nuk është menduar. Me mirëkuptim të plotë për kreun e KDRTSH-së do të japim një afat kohor dhe brenda dhjetë ditëve do të zgjedhim kryetarin", tha Peza.

Duke theksuar se komisioni është brenda afateve kohore për këtë procedurë, ai mendon se brenda dhjetorit do ketë përfunduar zgjedhja e Këshillit të ri Drejtues dhe ndoshta dhe zgjedhja e kreut të ri të RTSH-së.

"Ky proces do donim të përfundonte dhe me zgjedhjen e drejtorit të ri brenda këtij muaji. Nëse nuk do arrijmë atëhere mbetet të kryhet në ditët e para të janarit", tha Peza. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin