28/11/2013 16:08:26

Gjendet trupat e peshkatarëve në Durrës

Familjarët dhanë alarmin një natë më parë

DURRES - Trupat e dy peshkatarëve të pajetë janë gjetur nga forcat e policisë kufitare gjatë orëve të fundit, pas alarmit të dhënë nga familjarët e tyre natën e kaluar.

Burime zyrtare nga drejtoria e policisë së qarkut, bënë të ditur se trupi i peshkatarit Ram Metalia, rreth 50 vjeç, u gjet pak minuta më parë në zonën bregdetare të Currilave. Sipas të njëjtave burime mesnatën e kaluar ishte gjetur edhe trupi i pajetë i shokut të tij, Ndue Gjoka, 55 vjeç. Trupat e dy peshkatarëve janë gjetur rreth dy milje larg vendit ku ishin nisur për gjueti-shtuan burimet e policisë.

Burimet bënë të ditur se familjarët e dy peshkatarëve kërkuan ndihmën e policisë kufitare mbrëmjen e kaluar, kur dy peshkatarët nuk po ktheheshin në banesat e tyre në lagjen 13, në zonën e plazhit të Durrësit. Burimet e policisë bëjnë me dije se orët e fundit rreth 1 milje larg portit të Durrësit është gjetur një barkë pa njerëz, që dyshohet të jetë barka e dy peshkatarëve të mbytur. Pasditen e kaluar moti ka qenë i keq dhe deti i trazuar. Dyshohet se peshkatarët janë mbytur në këto rrethana-përfunduan burimet e policisë.Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin