28/11/2013 15:55:44

Një histori suksesi dhe mjerimi

Nga Laure Brumont

ROMË - Silvio Berlusconi, i dëbuar dje nga Senati pas dënimit për mashtrim fiskal, e ka drejtuar për rreth 10 vjet vendin e tij, një historie suksesi ala italiane e karakterizuar nga shumë disfata, mes shkëlqimit dhe mjerimit.

I njohur edhe me nofkën "Kajmani", për shkak të aftësisë së tij për të duruar goditjet, e quajti që më parë "grusht shteti" votimin e senatorëve për dëbimin e tij nga Parlamenti ku ai ka bërë vazhdimisht pjesë që prej rreth 20 vjetëve.

Silvio Berlusconi, bir i një nëpunësi banke të Milanos, lindur më 29 shtator 1936, fillon të punojë si drejtues shfaqjesh nëpër kroçera, ku i riu me një fizik të mirë këndon dhe tregon histori gazmore.

Pasi ka marrë një liçencë në drejtësi, ai i futet biznesit: fillon atëherë një ngjitje e parezistueshme që ngre pikëpyetje përsa i përket origjinës së pasurisë së tij, rekord në Itali për 10 vjet, për të cilën ai nuk është shprehur asnjëherë në mënyrë të qartë.

Por, është veçanërisht sektori i televizionit ku shprehet gjenia krijuese e këtij të talentuari në komunikim, i cili nuk ngurron, në vitet '80, t'i sheqerosë programet e tij me gra të zhveshura për t'i pëlqyer publikut.

Shoqëria e familjes Berlusconi, Fininvest, përfshin tre televizione, disa gazeta, botimet Mondadori, por edhe, qershia mbi tortë për këtë fans futbolli, Milanin, ekipi kampion i Italisë në vitin 2011.

Në 1994, "Kavalieri" - ishte kavalieri më i ri i urdhërit të punës - hidhet në politikë. Brenda disa javësh, ai krijon partinë ''Forza Italia'' dhe fiton zgjedhjet.

I urryer nga aleatët, qeveria e tij rrëzohet pas shtatë muajve. Në 2001, ai rikthehet në pushtet të cilin e mban deri në prill 2006, një rekord që prej periudhës së pastluftës.

I dërrmuar nga këto pesë vite, ai humb me të drejtë në zgjedhje, por merr një revansh mahnitës dy vjet më vonë, duke u vendosur përsëri në fron për të tretën herë.

Megjithatë, në nëntor 2011, atij do t'i duhet të heqë dorë, nën vërshëllimat e zemërimit, nga frenat e një Italie të përfshirë në një krizë të rëndë financiare për t'ia lënë vendin ekonomistit Mario Monti.

Disfata gjyqsore/ Por, në pranverën e vitit 2013, ai rishfaqet në skenën politike duke marrë një të tretën e votave në Parlament, një rezultat që e detyron të majtën të bëjë një aleancë të vështirë me armikun e saj historik.

Në fillim të tetorit, ai merr një fyerje publike nga vetë grupi i tij politik, kur ish- i përzgjedhuri i tij, Angelino Alfano nuk pranon të rrëzojë qeverinë. Kjo do të ndiqet nga një çarje mes përkrahësve të tij ndërkohë që miliarderi, 77 vjeç, është më i dobësuar nga disfatat gjyqësore.

Sepse më 1 gusht, ai dënohet për herë të parë në mënyrë përfudimtare: dënimi me katër vjet burg në çështjen Mediaset, tre prej të cilëve iu hoqën për shkak të një amnistie, konfirmohet nga Gjykata e Kasacionit. Pritet që ai ta kryejë dënimin në vitin 2014, në formën e punës për interes të përgjithshëm.

Ashtu siç ka bërë për gjatë gjithë këtyre viteve në proceset e tij të shumta gjyqësore, ai e heq veten si viktima e "togave të kuqe". Pavarësisht zhgënjimeve, Kavalieri vazhdon të jetë shumë i kujdesshëm për pamjen e tij të jashtme: flokë të lyer, bronxim i përhershëm falë një shtrese të trashë kremi fondant, ai përdor pa kompleks kirurgjinë estetike.

Gustoja e tij e pranuar për gratë e bukura, ndër të cilat prostitutat, arrin t'i kushtojë në pranverën e vitit 2009 një kërkesë të bujshme për divorc. Gjithashtu një dënim tjetër me shtatë vjet burg, kundër të cilit ai bën apel, për prostitucion me të mitura dhe shpërdorim posti, me heroina vajzën marokene "Ruby" dhe festat e quajtura "bunga-bunga".

Baba i pesë fëmijëve fryt i dy martesave dhe disa herë gjysh, ky personazh i jashtëzakonshëm, "i fejuar" që prej rreth dy vjetësh me një grua të re 28 vjeçe, shpërthen tek bashkëpatriotët e tij adhurimin pa kushte ose urrejtjen e thellë e të pavetëdijshme.

Hiperaktiv, gjumëpakët, pas një shqetësimi në nëntor 2006, ai i nënshtrohet një operacioni në Shtetet e Bashkuara të Amerikës për vendosjen e një aparati për stimulimin e ritmit të zemrës. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin