26/11/2013 15:41:18

Mocioni i integrimit nesër në Kuvend

Në Kuvend janë depozituar për shqyrtim dhe miratim disa pr/ligje të sjella nga qeveria dhe që janë përfshirë në axhendën parlamentare në vazhdim

TIRANË - Konferenca e kryetarëve miratoi të martën me konsensus kalendarin trejavor të punimeve të Kuvendit për ditët në vazhdim. Kjo u bë e ditur nga kryetari i Kuvendit, Ilir Meta, në fillim të punimeve të seancës së sotme plenare. Z Meta njoftoi deputetët se konferenca e Kryetarëve, e mbledhur para fillimit të seancës, ra dakord për zhvillimin të mërkurën të mocionit me debat për çështjet e integrimit europian, i kërkuar nga grupi parlamentar i Partisë Demokratike.

Javët e ardhshme deputetët në komisionet e përhershme do të shqyrtojnë disa ndryshime dhe shtesa në ligjin "Për parandalimin dhe goditjen e krimit të organizuar dhe trafikimit nëpërmjet masave parandaluese kundër pasurisë"; pr/ligjin "Për disa ndryshime dhe shtesa në ligjin "Kodi i procedurës penale të Republikës së Shqipërisë"; ratifikimi i marrëveshjes mes qeverisë shqiptare dhe asaj moldave "Për ripranimin e personave me qëndrim të paautorizuar"; një ndryshim në ligjin "Për mënyrën dhe procedurat e vendosjes dhe kalimit të forcave ushtarake të huaja në territorin e Republikës së Shqipërisë", etj.

Ndërkohë, seanca e sotme plenare, e cila nisi me një minutë heshtje në nderim të deputetit Sokol Olldashi, i ndarë tragjikisht nga jeta pak ditë më parë, po vijon me diskutimin e buxhetit faktik të shtetit për vitin 2012.

Pjesë e punimeve të sotme të Kuvendit janë dhe dy projektvendime:"Për mënyrën e trajtimit të deputetëve" dhe "Për fillimin e procedurave parlamentare për kontrollin e veprimtarisë ekonomike të KLSH"-së. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin