25/11/2013 17:03:01

''Nëpunësi'', nesër në Kushtetuese

Ankimimi kërkon pezullimin dhe shpalljen 'të papajtueshëm me Kushtetutën' të këtij vendimi

TIRANË - Gjykata Kushtetuese pritet të shqyrtojë të martën (ora 10:00), kërkesën e një grupi deputetësh të opozitës, që kërkojnë shfuqizimin e aktit normativ të qeverisë për disa ndryshime në ligjin e 'nëpunësit civil'.

Ankimimi në Kushtetuese i këtij akti, i miratuar më 30 shtator nga qeveria, kërkon pezullimin dhe shpalljen 'të papajtueshëm me Kushtetutën" të këtij vendimi.

Më 17 tetor, Kuvendi miratoi vetëm me votat e maxhorancës aktin në fjalë. Miratimi i tij u pa i domosdoshëm për shkak të pazbatueshmërisë së ligjit të 'nëpunësit civil', si pasojë e mungesës së akteve nënligjore dhe natyrës së përgjithshme të ligjit.

Vendimi i qeverisë u kundërshtua ashpër nga opozita e djathtë, pasi akti, sipas saj, synon që maxhoranca të bëjë spastrime në radhët e administratës.

Ligji "Për nëpunësin civil" ishte një ndër tre ligjet, miratimi i të cilëve u vendos si kusht nga Brukseli që Shqipëria të përfitonte statusin e vendit kandidat. Ai u miratua me konsensus në Kuvend më 30 maj, në një seancë të jashtëzakonshme. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin