25/11/2013 16:35:07

1 ndër 3 gra të dhunuara

Sipas Organizatës Botërore të Shëndetësisë, një nga format më të zakonshme të dhunës ndaj grave është ajo e ushtruar nga bashkëshorti ose partneri intim

TIRANË - Dhuna ndaj grave është një formë e përhapur e dhunimit të të drejtave të njeriut, e cila është llogaritur se mund të prekë në një formë a në një tjetër 1 në 3 gra në mbarë botën.

"Fakti që gratë janë shpesh të përfshira emocionalisht dhe të varura ekonomikisht ndaj atyre që i viktimizojnë ka ndikime të mëdha si në dinamikat e abuzimit dhe në përqasjet për ta trajtuar atë", shprehen specialistë të Institutit të Shëndetit Publik, në Ditën Botërore për Eliminimin e Dhunës ndaj Grave.

Në 48 studime të kryera në vende të ndryshme të botës, sipas tyre, nga 10 % deri në 69 % e grave raportuan se janë dhunuar fizikisht nga një partner intim në një moment të jetës së tyre. Ndërkohë, sipas një studimi të realizuar në Shqipëri në vitin 2003, më shumë se 1/3 e grave të martuara (37%) kishin eksperienca të dhunës fizike gjatë vitit të fundit. Gratë me nivel të lartë edukimi dhe me karrierë profesionale rezultuan me risk më të lartë për t’u prekur nga dhuna. Shpjegimi për këtë fenomen lidhet me faktin se kjo kategori e grave e percepton më mirë dhunën dhe e raporton atë.

Studimi i OBSH i vitit 2012 mbi ‘Përvojat negative gjatë fëmijërisë të të rinjve shqiptarë’ gjeti se rreth 30% e studentëve të intervistuar kishin qenë gjatë fëmijërisë dëshmitarë të dhunës së ushtruar ndaj nënës së tyre.

Në 1993, Deklarata e Vjenës dhe Programi për Veprim përkufizuan dhunën ndaj grave si “një akt i dhunës me bazë gjinore që rezulton në dëmtim fizik, seksual, psikologjik apo vuajtje të grave apo kërcënim për akte të tilla, një shtrëngim apo heqje e paarsyeshme e lirisë, të cilat ndodhin në jetën private dhe atë publike”. Format e dhunës me bazë gjinore përfshijnë (por nuk janë vetëm) dhunën në familje, abuzimin seksual, përdhunimin, ngacmimin seksual, trafikimin e grave, prostitucionin e detyruar dhe praktikën lënduese tradicionale.

Hapa të rëndësishëm përpara në parandalimin e dhunës ndaj grave janë bërë me hartimin e Strategjisë Kombëtare për Barazinë Gjinore dhe Dhunën në Familje, si dhe me miratimin e Ligjit nr. 9669, datë 18.12.2006, “Për masa ndaj dhunës në marrëdhëniet familjare”, i cila ka hyrë në fuqi në 1 qershor 2007.

"Ndonëse fushatat sensibilizuese kundër dhunës ndaj grave janë intensifikuar vitet e fundit kudo në botë, gjithashtu edhe në Shqipëri, sërish dhunimi i grave mbetet një problem madhor global, por edhe për vendin tonë", thonë specialistët, sipas të cilëve, kjo ditë synon intensifikimin e përpjekjeve sensibilizuese ndaj kësaj problematike. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin