25/11/2013 16:09:59

Kompania në borxh me shtetin

Qeveria hap tregun e aviacionit civil për operatorë të tjerë

(17:42) Ministri i Transportit dhe Infrastrukturës, Edmond Haxhinasto, deklaroi sot në lidhje me pezullimin e fluturimeve nga ana e kompanisë ajrore Belle Air se "nuk ka asnjë bllokim të llogarive nga asnjë nga institucionet shtetërore të vendit".

Në një konferencë për shtyp ministri Haxhinasto theksoi se "sot jemi njohur me një deklaratë të kompanisë ajrore Belle Air sipas të cilës ajo është e detyruar të pezullojë përkohësisht fluturimet, duke renditur si arsye situatën e përgjithshme ekonomike, rënien e fuqisë blerëse, recesionin në tregjet kryesore, si dhe bllokimin e llogarive bankare të saj".

"Sqarojmë opinionin publik, veçanërisht qytetarët që kanë bërë rezervime apo kane prerë biletat e udhetimit me këtë kompani, se situata është krejt e ndryshme nga sa deklarohet nga Kompania Belle Air. Ajo që ka ndodhur në fakt është një situatë e krijuar nga keqmanaxhimi i kësaj kompanie, nga mungesa e theksuar e transparencës dhe mosplotësimi i vazhdueshëm i detyrimeve ndaj organeve shtetërore, ndonëse është në një situatë të privilegjuar në tregun e aviacionit, duke kontrolluar mbi 50 % të tij", nënvizoi Haxhinasto.

Ministri Haxhinasto u shpreh se "mbështetja dhe fleksibiliteti ndaj Kompanisë Belle Air nga institucionet shtetërore kanë qenë maksimale. Kompania Belle Air ka një detyrim të hershëm ndaj organeve tatimore. Pavarësisht prej kësaj, janë bërë përpjekjet maksimale për të evituar ditën kur kjo kompani të mos ishte e afte të realizonte detyrimet ndaj qytetarëve Për këtë u arrit një marrëveshje nga autoritetet tatimore dhe vetë kompanisë Belle Air, me qëllim që të ristrukturohej detyrimi i saj dhe ajo të operonte normalisht në treg".

Ndonëse me një mbështetje të vazhdueshme nga Qeveria, vijoi Haxhinasto, Kompania Belle Air, arrin në një vendim të tillë të papritur dhe aspak në interest e qytetarëve që udhëtojnë me këtë kompani.

MInistri Haxhinasto tha se "pavarësisht nga këto vendime të Kompanisë Belle Air, institucioni përgjegjës për Aviacionin Civil, AAC, Ministria e Transporteve dhe Infrastrukturës, janë duke bërë gjithë përpjekjet ligjore për të lehtësuar këtë kompani të realizojë detyrimin që pasagjerët të udhëtojnë në destinacionet e tyre".

"Dëshiroj të theksoj edhe një herë vendosmërinë e qeverisë shqiptare, për të hapur tregun e aviacionit civil ndaj operatorëve të tjerë, në përputhje me ligjin dhe direktivat e Bashkimit Evropian, me qëllim që qytetarëve shqiptarë t’u ofrohet shërbim cilësor dhe me kosto të ulët.



TIRANË - Pas tetë vjet operimesh nga Shqipëria drejt destinacioneve Europiane dhe anasjelltas, kompania Belle Air është detyruar të pezullojë përkohësisht fluturimet e saj. Kompania Belle Air (fotot në aeroport) njoftoi se, “të ndodhur përballë një situate tejet të vështirë e kemi të pamundur për të vazhduar fluturimet. Ndërsa burime nga Drejtoria e Aviacionit Civil bëjnë të ditur se kompania ajrore Belle Air ka falimentuar. Krerët e kësaj drejtorie së bashku me përfaqësues të kompanisë po sqarojnë situatën, por nuk japin informacion, ndërsa burimet i thanë se kompania ka falimentuar. Ndërkohë që në ambientet e Ministrisë së Transportit dhe Infrastrukturës pritet një konferencë shtypi në lidhje me pezullimin e fluturimeve nga kompania ajrore Belle Air. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin