24/11/2013 13:18:17

Arratisja në Drenovë: arrestohen punonjësit e burgut

PD e shqetësuar për ngjarjen

(13:00) Partia Demokratike shprehu sot shqetësimin për ngjarjen e ndodhur në burgun e Drenovës, ku mbëmjen e së shtunës u arratisën nga ky burg 7 persona.

Në një konferencë për shtyp, koordinatorja për media në Partinë Demokratike, Silvi Bardhi, tha se "konstatojmë se për fat të keq shteti ka pushuar së ekzistuari në dy raste dje, dhe pikërisht për funksionet më të rëndësishme për të cilat shteti ekziston, për sigurinë dhe rendit publik".

Sipas saj, kjo situatë e rënduar e pasigurisë dhe e vërshimit të krimit e dobësimit të shtetit në çdo drejtim vjen si rezultat i mënyrës së qeverisjes.

(12:00) Ministri i Drejtësisë, Nasip Naço në një prononcim për mediat ka zbardhur detajet e arratisjes së shtatë të burgosurve nga Burgu i Drenovës në Korçë, mbrëmjen e djeshme, ndërsa theksoi dhe nevojën për disa ndryshime në ligj.

Po ashtu kreu i drejtësisë njoftoj edhe arrestimin e punonjësve të burgut të Drenovës që ishin në turnin kur është realizuar arratisja, lirimin nga detyra të drejtorit të këtij burgu, Genc Apostolit, si dhe të punonjësve të nivelit të lartë të Shërbimit të Kontrollit të Brendshëm, për mungesë profesionalizmi.

Nga verifikimet paraprake rezulton se në orën 18:30 minuta, personat e arratisur kanë qenë duke hyrë në klasën e të dënuarve në seksionin e sigurisë së lartë. Në momentin që kanë hyrë në klasë këta persona kanë qenë të armatosur me dy automatikë dhe dy pistoleta.

"Duke përfituar nga shkelja e skemës së sigurisë nga punonjësit e policisë, përgjegjës për realizimin e kësaj skeme, pasi i kanë marrë peng dhe nën kërcënimin e armëve kanë mundur të arratisen nga ky isnsititucion dhe më tej duke bashkëpunuar me persona të tjerë jashtë burgut, kanë prerë rrjetën e jashtme dhe më tej janë arratisur.”, theksoi Naço.

Po ashtu Ministri i Drejtësisë, bëri të ditur se personat e mësipërm e kishin planifikuar këtë arratisje disa muaj më parë dhe në funksion të realizimit të këtij plani në bashkëpunim me persona të tjerë kanë mundësuar gjetjen e materialeve si armë, lëndë prerëse për rrjetën apo shpërthyese..etj, dhe në bashkëpunim përsëri me të tjerë kanë realizuar arratisjen një ditë më parë.

“Pas sinjalizimit në policinë e Korçës, vijoi Naço, filluan hetimet për zbardhjen e të gjitha rrethanave, duke u ngritur një grup pune për të analizuar me imtësi të gjitha detajet, dhe marrjen masave për parandalimin këtyre personave.

Është vendosur masa e sigurisë për arrestimin e të gjithë punonjësve të turnit të cilët me veprimin ose mosveprimin e tyre kanë lejuar arratisjen e shtatë personave me rrezikshmëri të lartë shoqërore.”, tha Naço.

“Kjo ngjarje evidentoj se nuk ka funksionuar sistemi i sigurisë dhe informacionit, çka sjell si domosdoshmëri reformimin e sistemit të hartimit të kontrollit të brendshëm si shërbimi që garanton marrjen dhe shpërndarjen informacionit të brendshëm nëpër burgje.”, theksoi Naço.

Ministri i Drejtësisë bëri të ditur se ka liruar nga detyra drejtorin e burgut të Drenovës, Genci Apostolit, si dhe ka urdhëruar gatishmëri të plotë në institucionet e ekzekutimit të vendimeve penale.

Ministri ka kërkuar shërbim të përforcuar, për të garantuar siguri maksimale. Po ashtu Ministri i Drejtësisë ka urdhëruar menjëherë pezullimin nga detyra të punonjësve të nivelit të lartë shërbimit të kontrollit të brendshëm, të cilët me neglizhencën e tyre dhe me mosveprimin e tyre, si pasoj e mungesës profesionalizmit kanë krijuar terrenin e nevojshëm për ngjarjen e ditës së djeshme.

Po ashtu kreu i Drejtësisë njoftoj edhe nevojën e disa ndryshimeve në ligj. Sipas tij, ngjarja e djeshme, tregoi se sistemi i sigurisë në burgje eshte sistem i kalbur e jo profesional, i ndërtuar mbi bazën e emërimeve politike, korruptive dhe klienteliste.

Në funksion të rritjes së shërbimeve është i nevojshëm reformimi i këtij sistemi dhe për këtë është përgatitur paketa për ndryshimet në ligjin për policinë e burgjeve dhe për të drejtat dhe trajnimin e të dënuarve, tha ministri i Drejtësisë Nasip Naço.


PERRENJAS - Forcat e RENEA-s, FNSH dhe policia e qarkut të Elbasanit arrestuan mesditën e sotme në Prrenjas të Librazhdit tre prej gjashtë të arratisurve mbrëmjen e së shtunës nga burgu i Drenovës në Korçë.

Burime zyrtare nga Drejtoria e Policisë së qarkut të Elbasanit bënë të ditur se "të arratisurit e arrestuar janë Fran Mararshi, Admir Tafili dhe Gëzim Toma".Sipas policisë tre të arratisurit ishin strehuar në një magazinë në Prrenjas që në orët e para të mëngjesit të sotëm.Mësohet se në ambientet e magazinës u gjetën edhe armë zjarri, të cilat u sekuestruan nga policia.
Na ndiqni dhe në Facebook dhe Twitter

HermesNews-©2013

Dërgo me email | Stampo artikullin