18/11/2013 19:36:00

Gjosha në komision: strategjitë e reja të aderimit

Punë intensive në koordinim me ministritë e linjës, sidomos për vënien në zbatim të planit afatshkurtër të masave, sidomos kundër krimit të organizuar dhe korrupsionit

TIRANË - Ministrja e Integrimit Europian, Klajda Gjosha, raportoi të hënën në Komisionin Parlamentar të Integrimit lidhur me Planin e Veprimit, për prioritetet e lëna nga Komisioni Evropian pas rekomandimit për statusin.

Për një proces sa më të koordinuar të punës, ministria e Integrimit do të fillojë të rishqyrtojë Planin Kombëtar për zbatimin e MSA-së, plan në të cilin do të gjejnë reflektim dhe adresim sipas fushave, prioritetet e programit të qeverisë, detyrimet e MSA-së, problematikat dhe rekomandimet e Progres-Raportit.

Ky plan do të fillojë shumë shpejt, sepse, siç e theksoi dhe ministrja Gjosha, është shumë i nevojshëm për të bërë rekomandimet përkatëse dhe për të koordinuar me ministritë e linjës, si dhe për ta pasqyruar më pas në Komision.

Gjosha vuri theksin në punën intensive që po kryhet në koordinim me ministritë e linjës, sidomos për vënien në zbatim të planit afatshkurtër të masave, sidomos kundër krimit të organizuar dhe korrupsionit, i cili ka marrë tashmë edhe miratimin e qeverisë.

"Shumë shpejt do të fillojë plani i veprimit me masat afatgjata për 4 vitet e ardhshme, por ky plan është bërë për të dhënë një imazh të mirë dhe për të treguar vendosmërinë tonë në kuadër të procesit të integrimit", deklaroi ministrja.

Ajo vuri në dijeni anëtarët e komisionit për ristrukturimin e Ministrisë së Integrimit Evropian, ku ka një shtesë punonjësish në masën 20%. Nga 75 punonjës me strukturën e re do të ketë 90. Gjosha vlerësoi prioritetin e dhënë nga qeveria për dikasterin që drejton, duke theksuar se struktura e re është hartuar pas konsultimeve edhe me përfaqësues të Delegacionit Evropian dhe në Bashkëpunim me SMEI (projekt i BE-së).

"Jemi të bindur se kjo do të jetë struktura më e re dhe më e mirë funksionale që ne kemi patur në Ministrinë e Integrimit", u shpreh Gjosha. Ajo listoi hapat që po ndërmerren nga Ministria e Integrimit, qoftë në rang takimesh me përfaqësues të lartë shtetesh, ku përfshihet gjithashtu puna intensive me përfaqësues të lartë të Delegacionit Evropian, ku dëshmohet për vizionin dhe vullnetin e ri të qeverisë për të përmbushur standardet e integrimit. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin