15/11/2013 21:20:05

Vendimi që do të hyjë në histori: Shqipëria ''jo'' armëve kimike

Rama, nuk kemi kapacitetet e nevojshme. Merr fund ankthi i qytetarëve, të gjithë në festë

TIRANE - "Shqipëria nuk ka kapacitetet e nevojshme për t’u përfshirë në operacionin e shkatërrimit të armëve kimike të Sirisë", ishin fjalët e kryeministrit Edi Rama, që i dhanë fund protestës dy ditore të shoqërisë civile, të mbështetur nga studentë e gjimnazistë dhe personalitete të njohura të medias në vend.

Në një shesh të mbushur plotë e për plot nga kryqëzimi ku institucioni i kryeministrisë lidhet me Hotel Rogner Europa Park e deri në zonën e tek kryqëzimi pranë Piramidës, qytetarët e kanë pritur me ankth e padurim fjalën e Kryeministrit, e cila i dha fund frikës së tyre për mundësinë e asgjësimit të armëve kimike në vendin tonë.

Në protestën ku morën pjesë dhe figura të njohura të medias, si Këngëtarja Besa Kokdhima (vajza e dupetuetit të partisë Socialiste, Koço Kokdhima), Moderatori Ardit Gjebera, këngëtari Alban Skënderaj, Mirjam Cami, po ashtu këngëtarja Aurela Gaçe...etj, të cilët në pritje të përgjigjes u bashkuan me protestuesit duke kënduar Himnin Kombëtar të Flamurit.

Kryetari i Partisë Demokratike, Lulzim Basha e ka cilësuar si një veprim krejtësisht të imponuar nga revolta e qytetarëve shqiptarë, vendimin e Kryeministrit Rama për t’i thënë mos u përfshirë në operacionin ndërkombetar të demontimit të armëve kimike të Sirisë. Basha tha se opozita ndihet pjesë e gëzimit mbarëpopullor, ndërsa kujtoi se opozita bëri detyrën e saj në shërbim të qytetarëve me dorëzimin e kërkesës për referendum.

Pas marrjes së përgjigjes pozitive protestuesit vijuan të ruanin notat patriotike duke u bashkuar njëzërazi nën frazën, “oh sa mirë me qenë shqiptar”, ose “Shqipëria jemi ne”. Në fund të festimeve në sheshin përpara Kryeministrisë, të gjithë protestuesit nisën “Marshin e Fitores”, siç e quajtën ata, drejt qendrës së Kryeqytetit, ku vijuan “festën” qetësisht.

Nga krahu tjetër vlen të përmendet angazhimi dhe monitorim i vazhdueshëm që forcat e rendit i kanë kushtuar kësaj proteste qytetare. Përgjatë gjithë kohës uniformat blu kanë qenë në gatishmëri të plotë për të ofruar siguri dhe qetësi maksimale për qytetarët e Tiranës.

Po ashtu gjatë vlen të theksohet fakti se marshimi drejt qendrës, efektivët e Policisë, nga të gjashta komisariatet e kryeqytetit kanë ndjekur turmën përmes Bulevardit “Dëshmorët e Kombit”, ndërsa menjëherë tre furgona të FNSH-së u gjendën në qendër të Tiranës, për të siguruar kalimtarët në ato çaste ishin në atë zonë të Tiranës.

Ambasada amerikane në Tiranë sapo dha një deklaratë për mediat ku deklaron se "e respektojmë vendimin e Kryeministrit. Shtetet e Bashkuara e vlerësojnë faktin që Qeveria e Shqipërisë e shqyrtoi seriozisht mbështetjen e përpjekjes ndërkombëtare për të eliminuar materialet luftarake kimike të Sirisë në mënyrë të sigurtë. Shtetet e Bashkuara do të vazhdojnë të punojnë me aleatët dhe partnerët si dhe me ONAK dhe Kombet e Bashkuara për të siguruar eliminimin e programit të armëve kimike të Sirisë. Mbetemi besimplotë se do ta përfundojmë eliminimin e programit brenda afatit për të cilin është rënë dakord, thuhet në deklaratën e ambasadës amerikane në Tiranë. Shtetet e Bashkuara dhe Shqipëria kanë një miqësi të fortë dhe jetëgjatë. Ne vazhdojmë të mbështesim qeverinë dhe popullin e Shqipërisë teksa punojnë për të ndërtuar një shoqëri më të drejtë dhe më demokratike, përfundon deklarata e ambasadës.

Shoqëria civile, qytetarët shqiptar, gjimnazist e studentë ju drejtuan mëngjesin e të enjtes kuvendit të Shqipërisë për ti kërkuar ligj-vënësve ti thonë jo asgjësimit të armëve kimike Siriane në vendin tonë, pas lajmi të publikuar në media ku Shqipëria ishte një nga vendet kandidate për asgjësimin e armëve kimike.

Një risi e kësaj proteste ishte fakti se përgjatë gjithë kohës drejtuesit e saj kërkuan ta ndajnë nismën e tyre prej çdo lloj ngjyrimi politik. Na ndiqni dhe në Facebook dhe Twitter

Doriana Metollari

Dërgo me email | Stampo artikullin