11/11/2013 14:30:26

Ngacmime ''over 50'' ose jo

nga Doriana Metollari

HermesNews - S'ka rëndësi mosha, s'ka aspak rëndësi. Këto gjëra ndodhin dhe duhet folur. Gjithsesi këto janë tipare personash që unë i kam vërejtur tek kategoria "over 50": sigurisht nuk ka arsye të preken të gjithë meshkujt këtu.

Hera e parë që unë si femër jam ndjerë në siklet ishte në një takim zyrtar në Torino, me një delegacion nga Shqipëria, kur një prej shqiptarëve filloi të fotografonte me celular këmishën e hapur të një prej sekretareve të institucionit. Cova kokën në anën tjetër për të mos parë pëshpëritjet e dy prej italianëve që kishin parë të njëjtën skenë.

Kjo kategori për të cilën e kam fjalën nuk ia kanë shumë pak idenë sesi mund të hysh në sintoni me një femër. Janë pak a shumë të ardhur nga një mentalitet i mbyllur dhe ende nuk dinë sesi t'a menaxhojnë lirinë e raportit me seksin tjetër, më saktë, e menaxhojnë shumë keq, kalojnë nga afrimiteti në ngacmim, çfarë shpesh herë sjell agresivitete në biseda.

Kam kuptuar se përgjithësisht kanë një jetë martesore të ngrirë dhe nuk janë vulnerabël ndaj asaj që mund t'a quajmë "fytyrë" në publik, pikërisht sepse nuk kanë "asgjë për të humbur", ose thuajse asgjë.

Ja çfarë më thotë një mikja ime. "Shoqja ime është detyruar të lërë punën në Tiranë, sepse e ngacmonte jo vetëm shefi: ia kishin bërë jetën sterr dhe koleget sepse e shtynin të shkonte në shtrat me shefin e zyrës dhe i bënin lloj lloj batutash."

Sigurisht në këtë rast të flasësh për mbrojtje të të drejtave të grave, është e kotë, sepse femrat janë më meshkuj se meshkujt me qëllim që "njëra" të mos "dalë nga tufa".

Nëse prepotenca e këtyre meshkujve ka arritur në këtë pikë, kjo sepse askush nuk flet.

Gabimi numër një në Shqipëri është kur femrat heshtin "për t'u ruajtur nga fjalët". Kur duhet folur me zë të lartë duhet bërë për të mbrojtur dinjitetin tënd si femër. Kur duhet bërë publike, duhet bërë publike për të ruajtur pikërisht dinjitetin tënd si femër. Sepse kjo kategori meshkujsh "lulëzon" kur ka të bëjë me injorancë.

Ajo çfarë unë do t'u sugjeroja femrave dhe kjo jo për të themeluar klubin e amazonave, por për të jetuar jetën e vet secila në mënyrën e saj, pa u ndjerë e kushtëzuar nga trysnitë, është: a) fjala. Vajza, kur duhet duhet. Në konferencë, në banket, në zyrë apo në rrugë, fjala duhet të ketë medoemos tonin e saj të akullt. Nuk duhet kurresi t'i ulni sytë dhe të vazhdoni rrugën si të mos ishte asgjë.

Kjo lloj kategorie ka dhe një "pikë të dobët". Ruajtjen e reputacionit në familje. Një bisedë e sy më sy me bashkeshorten, bashkë me një copy paste të bisedës së fundit, që keni bërë, do t'ju lehtësonte shumë punë.

Nuk duhet të shfaqeni kurrsesi inferiore, apo vulnerabël ndaj këtyre ngacmimeve. Frika kapet në ajër shpesh herë. Një menefregizëm i shëndoshë është gjithmonë ilaç, por nëse këtë nuk ia arrini, atëherë ka dhe media. Këto lloj lajmesh janë "bukë për dhëmbët e tanë". Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin