10/11/2013 20:08:55

Lirohet reporteri amerikan i Miami Herald

Autoritetet venecuelane liruan të shtunën reporterin e Miami Herald, i arrestuar disa ditë më parë ndërkohë që po përgatiste një reportash mbi krizën ekonomike të Venecuelës

KARAKAS- Autoritetet venecuelase liruan të shtunën reporterin e Miami Herald, i arrestuar disa ditë më parë ndërkohë që po përgatiste një reportash mbi krizën ekonomike të këtij shteti të Amerikës së Jugut.

Miami Herald publikoi në faqen e saj zyrtare lajmin për lëshimin e gazetarit dhe reporterit Jim Wyss dhe dorëzimin e tij në duart e Ambasadës Amerikane. Më tutje vetë Wyss publikoi një status në Twitter duke falenderuar Miami Herald dhe të gjithë ata që bënë të mundur lëshimin e tij brënda pak ditësh.

Gazetari tregoi gjithashtu për Miami Herald se si kishte kaluar gjatë ditëve në burgun e imigracionit në Venecuele duke ironizuar mbi ushqimin dhe gjendjen e burgjeve dhe qelive tepër të vogla për të mbajtur një numër aq të madh të burgosurish. “Eshtë si të jetosh në një bar me krevate dykatëshe”- shkruan ai.

Wyss u arrestua të enjten në San Cristobal, në kufi me Kolumbinë, e njohur si një vatër e transaksioneve të paligjshme të përdorura për të shmangur kontrollet e rrepta monetare.

Autoritetet venezuelase nuk e bënë të ditur arsyen e arrestimit të gazetarit apo se për çfarë akuzohej. As vetë presidenti Nicolas Maduro, një kritik i deklaruar i Shteteve të Bashkuara, nuk e preku aspak këtë temë gjatë bisedës së tij televisive katër orëshe të premten në mbrëmje.

Reporteri amerikan qëndronte në Bogota, por udhëtonte shpesh drejt Venecueles. Ai gjendej në San Cristobal për të raportuar rreth zgjedhjeve komunale që do të mbahen muajin e ardhshëm, ndërkohë që vendi po kalon një krizë të thellë ekonomike me një inflacion që arrin në 54%.

Presidenti Maduro fajëson Shtetet e Bashkuara të Amerikës dhe rrymat e djathta se po destabilizojnë qeverinë e tij duke krijuar një “luftë ekonomike”. Shumë gazetarë dhe reporterë të mediave botërore kanë hasur vështirësi të shumta në raportimin e gjendjes së krizes në Venecuela. Shpesh herë ka pasur raste dhune apo arreste ndaj gazetarëve.

Gjithashtu zyrtarët qeveritarë cilësuan gazetarët e mediave të huaja si kundërshtues të revolucionit Chavist. Përveç rastit të arrestimit të një regjisori amerikan për mëse 6 javë, arsyet e arrestimeve dhe burgosjeve për periudha të shkurtra të shumë gazetarëve të tjerë nuk janë bërë ende të ditura.

Sipas raportimit të Herald, vetë Wyss u ndalua të hynte në Venecuelë pak para vdekjes së Chavez-it në mars. Ndërkohë që Claudio Paolillo, kryetar i komitetit për lirinë e shtypit në shoqatën amerikane InterPress, u shpreh i habitur për arrestimin e Wyss duke e komentuar rastin si një “provë më tepër të intolerancës së një regjimi, i cili çdo ditë e më shumë tregon përbuzje dhe intolerancë ndaj gazetarëve”.

Daniela Vathi

Dërgo me email | Stampo artikullin