09/11/2013 11:15:14

Çfarë bëjnë njerëzit e famshëm para se të flenë?

E keni pyetur ndonjëherë veten se çfarë mund të bëjnë njerëzit e famshëm para se të flenë?!

HermesNews - E keni pyetur ndonjëherë veten se çfarë mund të bëjnë njerëzit e famshëm para se të flenë?! Mund të duket banale, por nga detajet e vogla duken njerëzit e mëdhenj. Janë të shumta zgjedhjet e secilit, dikush punon ndërkohë që të tjerët flenë, ndërsa të tjerë, duke njohur efektet pozitive dhe relaksuese të gjumit, dhe nuk duan të humbasin kohë.

Shembulli i parë është presidenti amerikan Barack Obama,i cili preferon më tepër të punojë deri natën vonë, ndryshe nga para-ardhësi i tij në Shtëpinë e Bardhë, Bush, i cili ngrihej që heret në mëngjes. Për më tepër Obama lexon dhe shkruan para se të përgatitet për gjumë.

Vetë presidenti Obama e pati pohuar gjatë një interviste për gazetën amerikane Newsweek ku tregoi se gjatë mbrëmjes pasi përfundon së ngrëni darkën së bashku me familjen e tij, më pas luan dhe kalon ca kohë së bashku me dy vajzat e tij. Pasi i ka vënë në gjumë, lexon ose shkruan duke u marrë me punët e tij deri nga ora 23.30 dhe së fundmi për t’u përgatitur mirë për gjumë, lexon libra deri në mesnatë e herë-herë edhe më tej.

Drejtori direktiv i rrjetit social Facebook, Sharyl Sandberg, tregoi për gazetën US Today se para se të shkojë për të fjetur kontrollon email-et për herë të fundit, më pas fik telefonin, pasi mund ta zgjoje duke i prishur gjumin. Në mëngjes, pastaj, gjëja e parë që bën është të kontrollojë sërish email-et.

Mbreti i letërsisë horror, Stephen King, lan duart para se të flejë dhe jastekët e tij duhet të jenë në një posicion të caktuar. E çuditshme, por jo për një shkrimtar të zhanrit horror.

Arianna Huffington, drejtoresha e agjensisë informative me të njëjtin emër, para se të flejë, largon nga dhoma çdo aparat elektronik, Ipad, e-book, Kindle, etj. Ajo preferon t’i kushtohet leximit në momentet e fundit të ditës. E kush do të mendonte se drejtoresha e platformës më të famshme informative online, të preferonte librat prej letre të stilit të vjetër duke mënjanuar leximet elektronike ne e-book. Mesa duket epoka e informatikës nuk i ka pushtuar ende të gjithë.

Së fundmi, sjellim shembullin e Benjamin Franklin, një ndër themeluesit e shtetit amerikan. Ai përqëndrohej më tepër në një fazë “perfeksionimi moral” , pra një lloj bisede dhe përballjeje me vetveten. Cdo natë pyeste vetveten se ç’të mirë kishte bërë gjatë ditës. Analiza e ditës ishte thelbësore për vizionarin Franklin, ashtu si edhe të vënit rregull në dhomë ose të dëgjuarit pak muzikë përpara se të braktiste veten në krahët e gjumit. Na ndiqni dhe në Facebook dhe Twitter

Daniela Vathi

Dërgo me email | Stampo artikullin