07/11/2013 17:35:05

Mbyllet ''transporti'' i deputeteve

Axhenda e seancës së sotme parashikonte shqyrtimin e disa ndryshimeve në ligjin që rregullon transportin e zyrtarëve publikë, diskutimet e deputetëve të opozitës u spostuan tek zgjedhjet në Korçë

TIRANË - Kuvendi i Shqipërisë pas gati 6 orë debati, mbylli diskutimet e seancës së sotme, që u fokusuan tek akuzat e opozitës për blerjen e votave në zgjedhjet për bashkinë Korçë. Në mbyllje të debatit, që pritet të pasohet nga votimi i pikave të rendit të ditës, deputetët e Partisë Demokratike të opozitës nuk ishin të pranishëm në sallën e Kuvendit.

Ndonëse axhenda e seancës së sotme parashikonte shqyrtimin e disa ndryshimeve në ligjin që rregullon transportin e zyrtarëve publikë, diskutimet e deputetëve të opozitës u spostuan tek zgjedhjet në Korçë, të denoncuara nga PD, si të manipuluara.

Kryetari i grupit të PD-së, Edi Paloka tha se ndaj qytetarëve të Korçës është ushtruar presion për t'iu marrë atyre votat për kryebashkiakun. Sipas tij, ajo që ndodhi në Korçë provon akuzat e PD-së për blerjen e votave edhe në zgjedhjet e 23 qershorit.

Sipas Palokës opozita nuk do të lejojë shkeljen e Kushtetutës dhe lirisë themelore të qytetarëve për të zgjedhur përfaqësuesit e tij.

Kryeministri Edi Rama duke marrë fjalën në seancën e Kuvendit tha se maxhoranca është tërësisht e hapur për çfarëdolloj rruge që opozita dëshiron të ndërmarrë "për të bërë faktimin e interpretimit" për blerje të votave në zgjedhjet për bashkinë e Korçës.

"Jemi tërësisht të hapur për çfarëdolloj kërkese që dëshironi të ndërmerrni për të bërë faktimin e interpretimit tuaj. Për mua çdo gjë që ka lidhje me votën nuk është as e diskutueshme dhe as e negociueshme. Ju keni të gjithë të drejtën e zotit që interpretimin tuaj ta verifikoni në të gjitha rrugët që ju i konsideroni të drejta dhe që kushtetuta e ligji ia njeh, jo vetëm një opozite të tërë, por dhe një individi të vetëm", u shpreh kryeministri duke iu drejtuar deputetëve të PD-së.

Kryemiministri, gjithashtu, bëri me dije projektin që heq 1.6 milionë dollarë nga bonuset e qeveritarëve dhe politikanëve, për të zgjidhur deri diku problemet e personave me aftësi të kufizuar, problemet e pensionistëve apo një milion të papunëve, që sipas Ramës janë pasojë e keqqeverisjes.

Në këto momente, seanca parlamentare është ndërprerë për rreth 15 minuta me kërkesë të kryetarit të grupit parlamentar të Partisë Socialiste, Gramoz Ruçi. Me rifillimin e saj pritet dhe votimi i pikave të rendit të ditës. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin