07/11/2013 17:01:44

Vlore, hiqet bllokimi i godinës

Seanca që nisi në mesditë, kishte si objekt shqyrtimin e padisë së personave që kanë blerë banesa në këtë godinë, që emërtohet kompleksi Jon

VLORE - Gjykata administrative e Vlorës vendosi sot të heqë masën e bllokimit të godinës 8-katëshe në zonën e Ujit të Ftohtë, qe u bllokua të dielën nga Inspektoriati Ndërtimor Urbanistik Kombëtar për verifikimin e dokumentacionit. Seanca që nisi në mesditë, kishte si objekt shqyrtimin e padisë së personave që kanë blerë banesa në këtë godinë, që emërtohet kompleksi “Jon”.

Seanca drejtohej nga gjyqtari Astrit Sheme, ndërkohë që në sallë ishin të pranishëm përveç avokatëve Maksim Haxhia e Kastriot Brahimuço, që përfaqësojnë banorët edhe drejtues të Inspektoriatit Ndërtimor Urbanistik Vendor (INUV) dhe të Inspektoriatit Ndërtimor Urbanistik Kombëtar për degën e Vlorës (INUK).

Avokatët Haxhia e Brahimuço iu drejtuan Gjykatës së Vlorës me një padi për sigurimin e objektit deri në përfundim të procesit gjyqësor. Gjatë seancës u bë edhe administrimi i provave të paraqitura prej tyre. Nga ana e tyre, përfaqësuesit e INUV dhe INUK kërkuan rrëzimin e padisë, pasi sipas tyre, çështja nuk kishte objekt sepse gjithçka është në proces verifikimi të dokumentacionit, në përfundim të të cilit do të jepet edhe vendimi përkatës që mund të jetë gjobë, apo çdo masë tjetër.

Në vazhdim të seancës, që rinisi rreth orës 15.15, pas një ndërprerjeje të konsiderueshme, gjykata vendosi heqjen e masës së bllokimit të objektit, pasi sipas avokatëve, shiriti nuk mund të qëndrojë përderisa nuk ka ende një masë administrative. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin