03/11/2013 13:02:58

Lazaratasit perfundojne ne spital

Banoret semuren per shkak te kanabisit

LAZARAT- Me qindra persona kanë përfunduar në spital gjatë muajve të fundit për shkak të kultivimit dhe prodhimit të kanabisit. Denoncimi vjen nga mjekët për banorët e fshatit aq të njohur në të gjithë vendin Lazarat. Madje, Lazarati është quajtur edhe si “kryeqyteti i marijuanës shqiptare” për shkak të prodhimit tejet të shumtë të lëndës narkotike që përfundon në Tiranë.

E përditshmja britanike “The Guardian”, shkruan se si banorët e një fshati të tërë “të madh”, pothuajse po përfundojnë në spital për shkak të kanabisit. Doktorët e Gjirokastrës shpjegojnë se gati 700 persona kanë marrë ndihmën mjekësore për shkak të problemeve që u ka shkaktuar kultivimi i marijuanës, si të vjella, dhimbje në stomak, tension të lartë dhe rrahje të shpeshta të zemrës.

Ngjarjet kanë ndodhur në Lazarat, një fshat që në fund të sistemit komunist filloi të njihej për kultivimin dhe shitjen e kanabisit. Hysni Lluka, një doktor në spitalin më të afërt, ka shpjeguar se gjatë dy muajve të fundit kanë mbërritur në urgjencë deri në 10 persona thuajse cdo ditë, dhe pjesa më e madhe e tyre janë shtruar për shkak të shqetësimeve që lidhen me hashashin. Në Lazarat gati 2 mijë persona punojnë nëpër kampet e kanabisit, ku prodhuesit paguajnë 8 Euro për cdo 10 kilogram kanabis. Mes kultivuesve ka edhe shumë romë, të cilët kanë ngritur një kamp për shkak të fushatës dedikuar kultivimit të marijuanës.

Njëra nga arsyet që në Lazarat është përhapur epidemia e shqetësimeve nga kanabis, qëndron edhe nga kontrolli i shtetit për cdo lloj forme prodhimi dhe kultivimi. Zona ka qenë thuajse komplet e braktisur nga shteti për shkak të kriminalitetit të lartë. Policët të cilët afroheshin në kampin më të afërt, janë gjuajtur rregullisht nga kallashnikovët. Për këtë arsye, autoritetet kanë vendosur të futen me forcë nëpër ambjentet ku kultivohet marijuana. Fotot e bëra nga ajri, tregojnë qartë një hapësirë prej 60 hektarësh të cilat janë përgatitur posacërisht për kultivimin e kanabisit me gati 300 mijë parcela, në gjendje të prodhojnë deri në 500 tonelata marijuanë.
Na ndiqni dhe në Facebook dhe Twitter

Edison Myrteza

Dërgo me email | Stampo artikullin