02/11/2013 13:11:18

Durres. Biblioteka po shkaterrohet

Shembet tavani i salles se lexuesve

DURRES- Tavani i sallës së lexuesve në bibliotekën publike të Durrësit është shembur gjatë orëve të natës së kaluar, si pasojë e amortizimit dhe mungesës së mirëmbajtjes. Punonjësit e bibliotekës sot paradite kanë gjetur një pjesë të sallës së mbushur me mbeturina suvaje, ndërsa nga tavani vareshin fletët plastike dekorative.

Dëmtimet e rënda që vijnë si pasojë e amortizimit gradual të godinës dykatëshe, që ndodhet pas ndërtesës së prefekturës së qarkut, janë shfaqur disa herë jo vetëm në sallën e leximit, por edhe në mjedise të tjera të bibliotekës. Ndërhyrjet e bashkisë, që administron godinën, kanë qenë të pjesëshme, ndërsa përpjekjet për të ndërtuar një godinë të re kanë dështuar vazhdimisht.

Biblioteka e qytetit është themeluar më 10 shtator të vitit 1945 falë pasionit të bibliofilit Vangjel Toçi, i cili së bashku me disa familje të tjera, dhuruan mbi 1000 libra për institucionin e dijes. Ajo u vendos në një vilë të shtetëzuar në fillimet e sistemit komunist dhe që prej 20 vjetësh i është rikthyer zyrtarisht ish-pronarit të saj. Deri në gjetjen e një hapësire tjetër librat do të vazhdojnë të mbeten në godinën 2-katëshe. Aktualisht në bibliotekë janë strehuar mbi 230 mijë libra dhe periodikë, ndërsa në fondet e saj të rrezikuara nga amortizimi dhe lagështira zenë vend antikuare dhe libra me vlerë të albanologjisë.

Tashmë qyteti i Durrësit ka 208 mijë banorë dhe godina e vjetër vazhdon të shërbejë si e vetmja bibliotekë publike e qytetit për të rriturit, ndërsa në sistemin e leximit publik bëjnë pjesë edhe biblioteka e fëmijëve dhe biblioteka britanike. Qyteti antik trashëgoi të njejtën bibliotekë edhe në fillimin e viteve 1990 kur ra sistemi komunist, ndërsa gjatë 20 viteve të fundit projektet e administratave bashkiake për ndërtimin e një godine të re kanë mbetur në letër.
Na ndiqni dhe në Facebook dhe Twitter

HermesNews-©2013

Dërgo me email | Stampo artikullin