29/10/2013 13:42:24

''Doing Business'', çfarë solli për Shqipërinë ?

Përkeqësimi i pozicionit të Shqipërisë është ndikuar nga përmirësimet e vendeve të tjera, ndërsa në ndryshim nga një vit më parë, në listë janë shtuar 4 shtete të tjera

TIRANE - Këtë Shqipëria ka humbur 5 vende në renditjen në Raportin vjetor "Doing Business 2014" nga viti i kaluar duke u renditur në vendin e 90-të nga e 85-ta në klasifikim.

Banka Botërore ka publikuar raportin vjetor "Doing Business 2014", një vëzhgim mbi lehtësirat e të bërit biznes në 189 vende të botës, që merr në shqyrtim 10 tregues, që lidhen me kompleksitetin, kostot e proceseve rregullatore, kuadrin ligjor dhe institucional me të cilin ndeshet një aktivitet biznesi.

Pothuajse të gjithë treguesit për Shqipërinë kanë mbetur të pandryshuar, sipas raportit të fundit, ku vendi ynë përmendet vetëm se ka lehtësuar pagesat për korporatat, pasi taksat mbi të ardhurat mund t’i paguajnë në çdo tremujor.

Përkeqësimi i pozicionit të Shqipërisë është ndikuar nga përmirësimet e vendeve të tjera, ndërsa në ndryshim nga një vit më parë, në listë janë shtuar 4 shtete të tjera.

Shqipëria vazhdon të mbetet e fundit në treguesin për lejet e ndërtimit si dhe vitet e shkuara. Vlerësim negativ vendi ynë ka marrë sërish për kriterin e energjisë, që mat lehtësinë me të cilën një biznes mund të sigurojë furnizimin elektrik, duke u renditur në vendin e 158-të.

Edhe pse ndodhet në brezin e fundit të klasifikimit, Shqipëria ka përmirësuar pozitën për pagesën e taksave, duke u renditur e 146-ta, nga vendi i 160-të ku ishte vitin e shkuar.

Por përkeqësim të fortë, duke humbur 39 pozicione, Shqipëria ndodhet në treguesin e respektimit të kontratave, ku nga vendi i 85-të ka shkuar në të 124-in.

Shqipëria vazhdon të ruajë vlerësim pozitiv për treguesit që lidhen me marrjen e një kredie, mbrojtjen që gëzojnë investitorët, ku është respektivisht në vend të 13 dhe 14, me përmirësim nga viti shkuar.

Po ashtu Shqipëria është në pozicion të mirë me treguesit që lidhen me zgjidhjen e problemeve të likuiditetit, ku klasifikohet e 62-ta, me hapjen e një biznesi ku klasifikohet e 76-a, me 14 pozicione më keq se një vit më parë, pasi rezulton që ka shtim në procedura dhe një rritje të lehtë të kostove. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin