28/10/2013 15:12:07

Shoqata e të përmbyturve ngre zërin: kërkojnë dëmshpërblim

Përmbytja e pronave nga ujërat e Fierzës solli dëme ekonomike tek pronarët e tokave

KUKES - Familjet, te cilave u jane përmbytur pronat nga ujrat e liqenit të Fierzës kërkojnë zgjidhjen përfundimtare të problemit të tyre të zvarritur për vite me radhë. Në një letër drejtuar Këshillit të Ministrave ata kërkojnë ndërhyrjen për zgjidhjne e çështjes së dëmshpërblimit të tyre për pronën e humbur.

Kryetari i shoqatës së pronarëve që kanë humbur pronat në ujrat e liqenit të Fierzës, Sherif Kastrati, tha se, “kjo kërkesë bëhet pas zvarritjes së problemit të tyre nga të gjitha qeveritë e 20 viteve të fundit, gjë që ka sjellë edhe një gjendje mjaft të rënduar ekonomike për këto familje, të cilat nuk kanë as shtëpi, as pronë”. Janë rreth 30 mijë familje të rretheve të Kukësit, Hasit, Tropojës dhe Pukës që kanë pronat e tyre nën ujrat e liqenit të Fierzës. Shoqata e tyre e ngritur në vitin 1992 deri tani ka arritur të zgjidhë problemin vetëm për rreth 800 familje, për të cilat buxheti i shteti ka shpenzuar rreth 6,5 miliard lekë.

"Nuk kërkojmë asgjë më tepër se cfarë na kanë premtuar ndër vite. Nuk duam të mbetemi duke u gënjyer, por kërkojmë realizimin e premtimeve të tyre”, thotë Kastrati. Kërkesat kryesore të familjeve që kanë pronat e përmbytura në ujrat e liqenit të Fierzës janë largimi i shumë prej tyre në zonën fushore, dëmshpërblimi i tyre për tokën dhe pasurinë e humbur nën ujrat e liqenit të Fierzës, apo të jenë aksionerë në rast privatizmi të hidrocentralit.

Ndërtimi i hidrocentralit të Fierzës në vitin 1978 solli përmbytjen e qytetit të Kukësit të vjetër dhe të 36 fshatrave të rretheve të Kukësit, Hasit, Tropojës dhe Pukës. Për zgjidhjen e problemit, ata ngritën shoqatën e tyre në vitin 1992. Na ndiqni dhe në Facebook dhe Twitter

HermesNews-©2013

Dërgo me email | Stampo artikullin