23/10/2013 19:25:23

Burgim i përjetshëm për Aldo Hoxhën

Në Gjykatën e Tiranës u zhvillua sot seanca gjyqësore ndaj 20-vjeçarit Aldo Hoxha

TIRANË - Prokuroria kërkon burg të përjetshëm për Aldo Hoxhën, të akuzuarin për vrasjen me thikë të shtetases Fatbardha Tafa, në 7 gusht të vitit të kaluar, në tentativë për t’i vjedhur asaj varësen e floririt që kishte në qafë.

Në Gjykatën e Tiranës u zhvillua sot seanca gjyqësore ndaj 20-vjeçarit Aldo Hoxha, ku Prokurori Endrit Bimi lexoi pretencën, duke rindërtuar të gjithë mekanizmin e ngjarjes. Sipas prokurorisë, ekzistojnë të gjitha provat që 20-vjeçari të shpallet fajtor për vrasje dhe të dënohet me burg përjetë.

Sipas organit të akuzës, Aldo Hoxha kishte shenja në trup, pasi fëmijët që e shoqëronin viktimën në momentin e ngjarjes, e goditën me patina, në përpjekje për të mbrojtur nënën e tyre. Një nga provat kryesore sipas Prokurorisë është dhe fija e flokut që është gjetur në kapelen, të cilën fëmijët e viktimës e kanë dorëzuar në polici pas krimit. Prokuroria nënvizon se, Hoxha tentoi t’i fshihej policisë, pasi në momentin e arrestimit ai u gjet poshtë krevatit në shtëpinë e dajës së tij.

Nga ana tjetër, pala mbrojtëse mohon akuzat me pretendimin se, i pandehuri nuk ka qenë në vendin e ngjarjes, në kohën që është kryer vrasja.

Mbi Aldo Hoxhën rëndojnë akuzat e “vjedhjes me pasojë vdekjen” në dëm të Fatbardha Tafa dhe “plagosjes së lehtë me dashje”, në dëm të Lumturie Gjanës, motrës së viktimës Fatbardha Tafa. Seanca e radhës do të zhvillohet më datën 6 nëntor.

Dy motrat, Fatbardha Tafa, 38 vjeçe dhe Lumturie Gjana kishin dalë për të bërë xhiron e mbrëmjes në shëtitoren pranë ish- fushës së Aviacionit, kur janë bërë pre e grabitjes nga dy të rinj, të cilët lëviznin me motoçikletë. Katër ditë pas vrasjes Aldo Hoxha u arrestua. 20 vjeçari nuk e pranon vrasjen. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin