21/10/2013 17:52:18

Sequi 'Te merren masa per mjedisin'

Prezantohet Konsolidimi i sistemit të monitorimit mjedisor

TIRANE- Ambasadori i Bashkimit Evropian në Tiranë, Ettore Sequi, shprehu sot bindjen se qeveria do të marrë politikat e duhura në drejtim të mbrojtjes së mjedisit, ndërsa vlerësoi se të dhënat mjedisore janë të rëndësishme në këtë drejtim. "Pa të dhëna nuk mund të ketë progres dhe ne nuk mund të negociojmë realitetin, por vetëm mund të korrigjojnë", tha Sequi në tryezën për prezantimin e raportit "Konsolidimi i sistemit të monitorimit mjedisor",

Duke vënë në dukje standardet mjedisore evropiane, Sequi tha se "të jesh pjesë e BE ka detyrime, por sjell dhe të mira për qytetarët". "Shtetet anëtarë të BE janë në gjendje të shkëmbejnë informacionin dhe është e njëjta gjë edhe për Shqipërinë. Mbrojtja e mjedisit është përgjegjësi e përbashkët, sepse ndotja nuk njeh kufij", nënvizoi Sequi.

Sequi tha se në 7 vitet e fundit, BE ka financuar 140 milionë euro për çështjet mjedisore në Shqipëri. "BE do që Shqipëria të jetë një vend më i mirë për shqiptarët dhe ky është projekti që po prezantojmë sot", tha Sequi. Nga ana e tij, Ministri i Mjedisit, Lefter Koka, theksoi se për qeverinë mjedisi është prioritet, ndërsa iu referuar edhe vendimeve të fundit, të marra pak ditë më parë gjatë mbledhjes së Këshillit Kombëtar të Territorit, lidhur me ndërtimet e paligjshme në zonat e mbrojtura natyrore.

Një nga objektivat e projektit CEMSA, që u prezantua në tryezë, ishte zgjerimi i sistemit të monitorimit të mjedisit për të përmirësuar cilësinë dhe besueshmërinë e të dhënave mjedisore. Një tjetër objektiv ishte dhe konsolidimi i kapaciteteve në institucionet monitoruese shqiptare.

HermesNews-©2013

Dërgo me email | Stampo artikullin