19/10/2013 15:43:40

Strategji kundër trafikut të qënieve njerëzore

Kryeministri vuri në dukje se si pasojë e moskoordinimit të strukturave shtetërore, korrupsionit, presionit politik mbi shoqërinë civile dhe interferimit të krimit nëpërmjet hapësirave që lejon kuadri ligjor, Shqipëria ka sot një imazh negativ në botë sa i përket fenomenit të trafikut të qenieve njerëzore

TIRANË - Kryeministri Edi Rama, duke folur të shtunën, në një aktivitet të organizuar nga ministria e Brendshme, në kuadrin e "Ditës Europiane Kundër Trafikimit të Qenieve Njerëzore", e vlerësoi si emergjencë shoqërore ndërhyrjen e shtetit në këtë drejtim, në mënyrë që Shqipëria të mos hyjë në kutinë e zezë të vendeve që konsiderohen si të pashpresë.

"Kjo çështje kërkon një aksion të menjëhershëm, duke i dhënë përparësi zbatimit të ligjit, përmirësimit të kuadrit ligjor, mirëfunksionimit të institucioneve dhe mbrojtjes së viktimave", theksoi Rama.

Në kuadër të prioriteteve qeverisëse në fushën e rendit dhe sigurisë, Kryeministri vlerësoi me rëndësi "fuqizimin i Byrosë Kombëtare të Hetimit, një hallkë e munguar e koordinimit mes organeve të rendit dhe drejtësisë në parandalimin e fenomenit".

"Me fuqizimin e Byrosë Kombëtare të Hetimit, do të kemi një standard tjetër, që garanton evidentimin dhe hetimin e veprave penale në zbatim të strategjisë së re dhe planit të veprimit kundër krimit të organizuar", tha Rama.

Gjithashtu, shtoi kryeministri, "përballja me sofistikimin e krimit, kërkon luftë shumë të sofistikuar, ndaj qeveria është e vendosur të shtrijë këtë betejë në nivel vendor deri në rrafshin ndërkombëtar, të angazhojë burimet e duhura njerëzore, të ofrojë mjetet teknike dhe mbështetjen financiare".

Edhe mbrojtja e viktimave, për të mos lejuar transformimin e tyre, nga viktima në aktor, është një tjetër çështje që kërkon zgjidhje, tha Rama, dhe kjo kërkon krijimin e instrumentave të duhur ligjore.

Në betejën kundër trafikimit të qenieve njerëzore, por jo vetëm, Kreu i Qeverisë vlerësoi edhe përkrahjen ndërkombëtare, ku veçoi dy partnerët kryesorë të Shqipërisë. "Shqipëria sot është e dobët përballë sfidave të mëdha, por Shqipëria sot ka dy miq të mëdhenj, dy partnerë të mëdhenj. Ka dy krahë, që nuk do ta lënë kurrë të përplaset përtokë, që janë SHBA dhe BE-ja", deklaroi Rama. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin