18/10/2013 18:39:28

Ish ministrat nuk mund të paguajnë darkat, si ''ish ministra''

nga Doriana Metollari

HermesNews - Qytetarët nuk mund të paguajnë borxhin ndaj bizneseve, tha dje në profilin e tij Facebook, deputeti socialist Erjon Braçe, duke iu referuar faturave të rënda të ish ministrave të Berishës, të cilët sipas tij, kanë përkeqësuar situatën me të cilën sot po lajnë hesapet me vështirësi socialistët.

"Borxhi i krijuar nga mosshlyerja e faturave të drekave dhe darkave të ish ministrave nuk duhet paguar nga paratë e qytetarëve, por t'u bëhet ngarkim dhe të paguhet nga xhepat e ish ministrave", tha kryetari i komisionit të ekonomisë.

Borxhi ndaj bizneseve në rrezik besueshmërinë e kësaj qeverie ndaj privatëve, dhe 84 votat e mazhorancës që dje miratoi projektìligjin për auditin e huaj nga kompania Deloitte, nuk do të mund t'i japë, fatkeqësisht, atë çfarë deputeti i mazhorances propozon për shlyerjen e borxhit.

Raporti mund të japë një panoramë për nivelin dhe detajet e borxhit, por çështja do të ketë me siguri komplikacione ligjore, për faktin se ish ministrat ishin përfaqësues të shtetit dhe jo privat.

Privatët ligjërisht i japin para borxh shtetit dhe jo qeverive. Shteti përgjigjet para privatëve dhe jo ish ministrat si persona privat.

Implikimi i tyre privatisht në këtë borxh është ligjërisht i pamundur.

Kjo çështje do të mund të ndryshojë nëse ish ministrat në kohën e Berishës, pra jo shumë më parë, kanë thyer ligjin, por për këtë është gjithsesi gjykata që përgjigjet dhe vetëm pas një vendimi te saj, borxhi shlyhet nga ish ministrat si persona fizik ndaj shtetit sot.

Në një mënyrë apo tjetër, borxhin ndaj privatëve kjo qeveri duhet t'a shlyejë pasi përbën një ndër premtimet elektorale të socialistëve, që sot ndodhen nga njëra anë nën trysninë e fondit monetar ndërkombëtar, situatën e rëndë financiare dhe premtimet elektorale. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin