18/10/2013 13:05:56

Raporti i BEsë: KLSH raporton dëme ekonomike. Parlamenti i injoron

Raporti shkruan për rritjen e auditit nga Këshilli i larte i shtetit dhe raportimin e dëmeve të mëdha ekonomike, por aktualisht ''nuk ka ndjekje sistematike parlamentare të raporteve të KLSH-së''

TIRANË - Në Progres Raportin e 2013-së, prezantuar dy ditë më parë në Bruksel nga Komisioneri për Zgjerim i BE-së, KE vlerëson: "Kontrolli i Lartë i Shtetit e ka përmirësuar performancën e tij, duke adoptuar një manuali të ri për auditimin dhe duke kryer më shumë auditime”.

Në Progres Raport thuhet se: "ai i paraqiti Parlamentit në muajin Mars një raport vjetor për punën e tij. Ai kreu 177 auditime dhe raportoi dëm ekonomik të shkaktuar nga funksionimi i papërshtatshëm i institucioneve shtetërore në vlerën 97.3 milionë euro, nga 50 milionë euro në vitin 2011".

Gjithashtu, vihet në dukje: "KLSH ka dorëzuar në Prokurori 40 kallzime për hetime penale (që përfshijnë 125 punonjës), dy herë më shumë se gjatë tre viteve të kaluara së bashku, duke theksuar në veçanti abuzimin me pronën publike nga administratorët publikë të rangut të lartë. Më shumë se dy të tretat e rekomandimeve të Institucionit janë zbatuar nga subjektet e audituara. Amendimet në Kuvend ndaj Ligjit organik të KLSH janë në pritje dhe po ashtu pritet të zbatohet një auditim i qendrueshëm i performancës".

KE shkruan: "në fushën e auditimit të jashtëm, ndryshime organizative dhe procedura të reja janë futur për të shtuar efikasitetin e Institucionit Shtetëror të Auditimit (SAI). Aktivitetet e trajnimit dhe të marrëdhënieve me publikun janë rritur dhe bashkëpunimi dypalësh me SAI-t e vendeve të tjera është zgjeruar”.

"Auditimi i performancës ka rifilluar. Plani strategjik i zhvillimit 2013-2017 është në përgatitje e sipër. Megjithatë, ndryshimet e Ligjit të KLSH-së janë që nga viti 2012 nën mbikëqyrjen e Parlamentit dhe mbeten të miratohen nga një shumicë me tre të pestat. Aktualisht, nuk ka ndjekje sistematike parlamentare të raporteve të KLSH-së", thuhet në Progres Raportin e KE-së për KLSH. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin