17/10/2013 18:24:21

Njëmbëdhjetë nobelistë i shkruajnë Putin

Mbrojtje për 30 anëtarët e një anijeje të organizatës

MOSKË - Njëmbëdhjetë laureatë të çmimit Nobel për Paqen, mes të cilëve edhe arqipeshkvi afrikanojugor, Desmond Tutu i drejtuan një letër, e cila u publikua sot, presidentit rus, Vladimir Putin, duke marrë në mbrojtje 30 anëtarët e një anijeje të organizatës "Greenpeace" të arrestuar në shtator.

"Ju shkruajmë që të bëni të pamundurën për heqjen e akuzave për pirateri ndaj 28 militantëve të Greenpeace, një fotografi dhe një kameramani dhe që ato të jenë konform legjislacionit ndërkombëtar dhe atij rus", citon letra e laureatëve.

"Jemi të bindur që ju ndani të njëjtën dëshirë me ne për respektimin e së drejtës për protesta paqësore", thekson letra e publikuar nga organizata joqeveritare.

Njëmbëdhjetë laureatët, mes të cilëve figurojnë edhe avokati iranian, Shirin Ebadi dhe amerikani, Jody Williams, paralajmëruan njëkohësisht presidentin rus ndaj rreziqeve të nxjerrjes së naftës në Arktik.

"I bëjmë thirrje të gjitha vendeve për ruajtjen e këtij thesari të çmuar të njerëzimit dhe të çlirohen nga varësia ndaj energjisë së prodhuar nga nafta. Duke qenë se jeni një nga vendet e interesuara drejtpërdrejt, iu bëjmë thirrje ta shqyrtoni personalisht çështjen në fjalë", shkruajnë laureatët e nobelit të paqes në letrën drejtuar presidentit rus, Vladimir Putin.

Zëdhënësi i presidentit rus, Vladimir Putin, Dmitri Peskov u shpreh se letërshkruesit nuk kishin zgjedhur marrësin e duhur. "Presidenti ka shumë respekt për laureatët e çmimit nobel për paqen dhe i kushton vëmendje opinionit të tyre. Por, në këtë rast, presidenti nuk është marrësi i duhur i letrës në fjalë", theksoi Peskov, i cituar nga agjencia ruse zyrtare e lajmeve "Ria-Novosti". Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin