17/10/2013 17:29:56

I vetmi konvikt rrezikon të mbyllet

I vetmi konvikt në Kukës nuk ka fonde

KUKES - Konvikti i vetëm në qytetin e Kukësit, ku janë të strehuar mbi 250 nxënës të shkollës së mesme “Havzi Nela”, nxënës të ardhur nga zonat rurale të rretheve të Kukësit, Hasit dhe Tropojës, rrezikon të mbyllet për mungesë të fondeve.

Duke e bërë të ditur këtë fakt, kryetari i bashkisë, Hasan Halilaj, saktësoi se, “Ministria e Arsimit thuajse e ka braktisur, pasi ka harruar të lëvrojë fondet e nevojshme për një ecuri normale të jetës në këtë institucion të arsimit. Nëse vazhdon kështu, nuk ka pse bashkia të shpenzojë para për mbajtjen e tij, kur fondet duhet të vijnë nga Ministria e Arsimit per trajtimin e konviktorëve në këtë institucion”.

Sipas tij, “është i çuditshem caktimi nga ana e Ministrisë e një vlere prej 200 lekësh për një muaj qëndrimi në konvikt, vlerë që është krejtësisht e pamjaftueshme”.

Që nga viti i kaluar nxënësit konviktorë janë duke u trajtuar në konvikt falë kontributit të bashkisë, por një gjë e tillë nuk mund të vazhdojë pambarim. “Taksapaguesit e qytetit kërkojnë që me këto fonde t’u shërbehet atyre dhe jo të mbulohen “vrimat” që lë Ministria e Arsimit, e cila i ka borxh bashkisë të paktën mbi 40 milion lekë.

Cfarë nuk e bën Ministria, gjatë kësaj kohe e ka bërë bashkia, qe për trajtimin e konviktorëve heq nga arka e saj më shumë se 13 milion lekë në vit", tha ai. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin