15/10/2013 09:58:35

Tahiri, askush nuk do t'i shpëtojë ''rrjetës'' së ligjit

Tahiri, ''operacioni sapo ka filluar dhe tashme jemi në fazat e para të raportimeve lidhur me nivelin e goditjes së bizneseve të paligjshme në të gjithë Republikën''

Cila ishte zanafilla dhe mbi ç‘bazë nisi operacioni masiv i efektivëve të policisë dhe inspektorëve tatimorë në 12 qarqet e vendit ?

Besoj që nuk është e re për askënd nga ne dhe për çdo shqiptar që lojërat e fatit u kthyen nga një bazë paligjshmërie në një plagë sociale dhe ekonomike për buxhetin e çdo familje shqiptare dhe në një çerdhe kriminaliteti, e cila krijonte probleme dhe për rendin publik dhe qetësinë e qytetarëve. Kemi premtuar mbylljen e lojërave të paligjshme të fatit. Unë jam mjaft krenar që ne sot realizuam këtë aksion, me të gjitha forcat e policisë në dispozicion, me 6 mijë forca policie në çdo cep të Republikës së Shqipërisë, me Drejtorinë e Përgjithshme të Tatimeve dhe me Drejtorinë e Lojërave të Fatit në Ministrinë e Financave. Është një aksion që, sigurisht, nga njëra anën na tregoi forcën e Policisë së Shtetit dhe vullnetin e saj, por nga ana tjetër edhe pikat e dobëta dhe për këtë ne jemi ende duke punuar. Aksioni ka nisur rreth orës 17:00 dhe deri më tani janë bllokuar mbi 350 subjekte në të gjithë Shqipërinë, që me llogari kompjuterësh janë shumë më shumë. Ky aksion do të vazhdojë deri në verifikimin e pikës së fundit, kudo që të jetë, në çdo cep të Shqipërisë.

A është kryer një hetim i mëparshëm për këtë. A mendoni se mund të ketë pasur interesa që është lënë të lulëzojë ky lloj informalitet kaq masiv ?

Ky është vetëm fillimi i operacionit. Pra për evidentimin dhe mënjanimin e shfaqjes më sipërfaqësore të paligjshmërisë në lidhje me këtë biznes. Pas kësaj Policia e Shtetit do të fillojë një hetim më të thelluar lidhur me njerëzit që e kanë organizuar, që e kanë favorizuar dhe lejuar këtë biznes të paligjshëm, në kurriz të qytetarëve shqiptarë. Nuk mund të them më shumë detaje lidhur me këtë, pasi ka të bëjë menjë operacion policor në vazhdim. Jemi të fokusuar në zgjidhjen një herë e mirë të këtij problemi.

A është produktiv ky aksion ? Po goditen të gjithë bizneset e pa liçensuara, sipas një plani masash, apo nuk mund të shmangen dhe goditje selektive ?

Jo, nuk besoj se është e mundur të shpëtojnë nga ky operacion, për vetë përmasat e operacionit, për përfshirjen institucionale dhe bashkëpunimin e Policisë së Shtetit me Drejtorinë e Tatimeve dhe Drejtonë e Lojërave të Fatit dhe gjithashtu, për opinionin publik, i cili tashmë është përfshirë në këtë proçes. Unë kam shumë shpresë që do përfshirë akoma më shumë në çdo denoncim që mund të na mundësojë ne zhvillimin e këtij aksioni në Republikën e Shqipërisë Ne jemi të vendosur që ta implementojmë premtimin tonë elektoral, premtimin e Kryeministrit dhe të qeverisë për mbylljen e lojërave të paligjshme të fatit. Jemi në fillim të këtij procesi.

A ka të dhëna se sa mund të jetë evazioni ? Nëse jo, kur mund të ketë një bilanc të dëmit që i është shkaktuar shtetit gjatë kësaj periudhe ?

Nuk e kam këtë të dhënë, sepse kërkon një shqyrtim më të hollësishëm dhe analiza financiare, të cilat nuk jemi në gjendje ti bëjmë tani. E përsëris, operacioni sapo ka filluar dhe tashme jemi në fazat e para të raportimeve lidhur me nivelin e goditjes së bizneseve të paligjshme në të gjithë Republikën. Me siguri do të kemi komunikim të vazhdueshëm dhe do t’ju bëj me dije çfarë ndodh. Me lejoni të shfrytëzoj rastin dhe të falënderoj të gjithë efektivët e policisë, inspektorët e tatimeve dhe të lojërave të fatit, sepse është një aksion që me të vërtetë shënon një pikë kthese në historinë e bashkëpunimit institucional në Republikën e Shqipërisë. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin