14/10/2013 15:59:05

Dimensioni i ri i marëdhënieve me Greqinë

Rama dhe Venizelos diskutojnë problemet e kaluara dhe prespektivat e rejat mes të dyja vendeve

(17:45) "Gjendjen e paqes mes Greqisë dhe Shqipërisë e ka shpallur që në vitin 1986 dhe dikush që ka për të kërkuar diçka te kuadri ligjor grek ka të drejtën t'i drejtohen gjykatës ndërkombëtare të Strasburgut", deklaroi sot Zv.Kryeministri njëheraz dhe Ministri i Punëve të Jashtme të Greqisë, Evangjelos Venizellos. Gjatë konferencës së përbashkët për shtyp, me kreun e MPJ-së, Bushati, Kryediplomati grek tha se, "jemi dy vende që besojmë në nevojën e stabilitetit në rajonin tonë dhe më gjërë". Pra, deklaroi ai, kemi një kuadër të sigurtë bashkëpunimi, që përshkohet nga marrëveshje si dypalëshe, ashtu edhe shumë palëshe dhe gëzohemi që tani po hedhim edhe hapa pasardhës. Venizellos bëri të ditur se, "vendosëm që të mblidhet komisioni dypalësh për çështjen e varrezave ushtarake si dhe gëzohem që do të riaktivizojmë të gjitha ato komisione të përbashkta për të diskutuar të gjitha ato çështje që janë në interesin tonë".


(17:30) "Përgjigjen për paktin e ka dhënë Gjykata Kushtetuese", deklaroi sot Kryediplomati shqiptar, Ditmir Bushati. Në përgjigje të interesit të gazetarëve për këtë çështje, gjatë konferencës me homologun e tij grek, Bushati tha se, Ministri me të drejtë përmendi kriteret e Kopenhagenit, respektin për ata që imponon shteti i së drejtës". Ai tha se "sot nuk shtrohet më pyetja për qeverinë shqiptare si e lexon vendimin e Gjykatës Kushtetuese, pasi është i qartë si kristali". Për qeverinë shqiptare, deklaroi Kryediplomati shqiptar, "shtrohet pyetja si do të ecet përpara për t'i dhënë një zgjidhje kësaj çështjeje, e cila është e rëndësishme për Shqipërinë, Greqinë dhe projektet e përbashkëta për rajonin e Mesdheut. Dhe përgjigja ime është shumë e drejtëpërdrejtë. Duam të adresojmë të gjitha çështjet si ato qëi konsiderojmë pengesa historike dhe ato që janë krijuar rishtazi me kurajo e vullnet politik, bazuar në legjislacionet e vendeve respektive, parimet e themeluara të së drejtës ndërkombëtare".


(17:00) I pyetur nga gazetarët se si do të trajtohet çështja kufinjve detare, gjatë Presidencës greke të BE-së, Zv.kryeministri grek deklaroi gjatë konferencës për shtyp me Ministrin Bushati se, "baza e përbashkët e “Vitit Mesdhetar”, që është një ndër vitet që përbëhet nga presidencat e njëpasnjëshme të Greqisë e Italisë, është politika e integruar detare, që në epiqendër ka Mesdheun". Ministri grek tha se, "KE-ja ka publikuar një studim të rëndësishëm që tregon se zbatimi i së drejtës ndërkombëtare të detit, ka shumë rëndësi ekonomike për të gjithë vendet e BE-së dhe për vendet që lagen nga Mesdheu". Ai tha se, "të gjithë vendet anëtarë të BE-së pranojnë të drejtën ndërkombëtare mbi detin dhe konventën ndërkombëtare të OKB-së mbi zbatimin e së drejtës ndërkombëtar të Detit. Kjo është e qartë se kriteret e Kopengahenit vlejnë dhe për ato vende kandidate për anëtarësimin në BE". "Ka një praktikë europiane, dhe një shembull është rasti i Italisë e Greqisë. Ekziston një praktikë europiane dhe shembull greko-italian dhe jam i sigurtë se në të njëjtin drejtim do të lëvizim në Shqipëri sepse kemi pranuar të njëjtat rregulla e parime", tha Venizellos.



TIRANE - Kryeministri Edi Rama priti Zv/kryeministrin dhe Ministrin e Punëve të Jashtme të Greqisë Evangelos Venizelos. Rama vuri theksin në vullnetin e qeverisë shqiptare për t’i dhënë një dimension të ri këtij bashkëpunimi në frymën e miqësisë dhe të interesit më të mirë të të dy vendeve.

Gjatë këtij takimi u trajtuan problematikat që ekzistojnë, të tashme, apo të trashëguara nga e kaluara. Kryeministri Rama tha se qeveria shqiptare mbetet e vendosur për të forcuar bashkëpunimin rajonal. Marrëveshja Kosovë-Serbi, u shpreh Kryeministri, ka hapur një kapitull të ri në marrëdhëniet e bashkëpunimin midis vendeve të rajonit.

Në takimin me kreun e PD-së Lulzim Basha ky i fundit ngriti çështjen e anullimit të ligjit të luftës, si çështje e rëndësishme jo vetëm për shkak të përceptimit, por sidomos edhe të problemeve në lidhje me sekuestron konservative për pronat e qytetarëve shqiptare, veçanërisht atyre Çame.

Basha kërkoi angazhimin për zgjidhjen e problemit të toponimeve që ka vështirësuar lëvizjen në kufi të qytetarëve shqiptarë të lindur në Greqi.

Kryetari i Partisë Demokratike vlerësoi si bazë shumë të mirë dhe solide traktatin e vitit 1996 të "Miqësisë, Bashkëpunimit, Fqinjësisë së Mirë dhe Sigurisë" mes dy vendeve dhe inkurajoi ngritjen e komisioneve të përbashkëta sipas parashikimeve të këtij traktati për të nxitur dhe forcuar bashkëpunimin e mëtejshëm. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin