14/10/2013 11:11:50

Ministret para komisionit për dy çështje të rëndësishme politike

Pjesë e axhendës së komisioneve kuvendore gjatë ditës së hënë do të jenë dhe disa projektligje

TIRANË - Vizioni i qeverisë socialiste për proçesin e integrimit dhe fillimi i vitit të ri shkollor në sistemin arsimor do të jenë në fokus të dy seancave të veçanta dëgjimore që do të zhvillohen paraditen e së hënës në komisionet respektive, atë të Integrimit dhe Mjeteve të Informimit Publik.

Ministrja e Integrimit, Klajda Gjosha pritet të raportojë para deputetëve mbi procesin e integrimit, një nga prioritetet kyçe të qeverisë së drejtuar nga kryeministri Edi Rama, ndërsa brenda kësaj jave pritet publikimi i Progres Raportit të Komisionit Europian për Shqipërinë. Në rast të një opinioni pozitiv nga Brukseli, Shqipërisë, në fund të vitit, mund t'i njihet statusi i vendit kandidat, për t'i hapur më pas rrugën çeljes së negociatave për anëtarësim.

Fillimi i vitit të ri shkollor në sistemin arsimor parauniversitar dhe atë universitar dhe problematikat që e shoqërojnë do të jenë në qendër të seancës dëgjimore që ministrja e Arsimit dhe Sportit, Lindita Nikolla do të zhvillojë të sot me anëtarët e komisionit të Mjeteve të Informimit Publik.

Pjesë e axhendës së komisioneve kuvendore gjatë ditës së hënë do të jenë dhe disa projektligje, si ai "për miratimin e marrëveshjes për kryerjen e shërbimit të auditimit të borxhit të ministrive kundrejt biznesit vendas dhe të huaj" që do të shqyrtohet nga komisioni i Ekonomisë apo pr/ligji "Për sigurinë në anije dhe porte" që është në rend dite të komisionit të Sigurisë dhe atij të Veprimtarisë Prodhuese. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin