08/10/2013 18:53:54

Peza hedh hapin e parë, kërkon shkarkimin e kreut të AMS-s

Fillim proçedurash për shkrirjen e Këshillit Drejtues të RTVSH dhe emërimin e këshillit të ri, nga i cili do të zgjidhet dhe drejtori i RTVSH

TIRANE - Nënkryetari i komisionit të medias Alfred Peza (dokumente), kërkon shkarkimin e kryetares së AMA-s Endira Bushati dhe fillimin e proçedurës për shkrirjen e Këshillit Drejtues të RTVSH dhe emërimin e këshillit të ri, nga i cili do të zgjidhet dhe drejtori i RTVSH.

Kërkesa e Pezës bazohej jo vetëm në përfundimin e mandatit të tyre, por dhe në performancën e dobët dhe shkeljet e mëdha antiligjore të vërejtura në punën e tyre.

"Momenti i dytë ka të bëjë me Autoritetin e Mediave Audiovizuale. Edhe ky autoritet për shkak edhe të rotacionit të pushtetit në zgjedhjet e 23 qershorit është duke funksionuar edhe në këtë moment që po flasim, në paligjshmëri. Ka tre vende vakante, por nga ana tjetër, siç keni dhe dokumentin e Shërbimit të Monitorimit të Institucioneve të Pavarura në lidhje me veprimtarinë dhe problematikën e punës së Autoritetit të Mediave Audiovizuale për periudhën maj - korrik 2013", thuhet që është detyrim ligjor i Kuvendit të bëjë 3 zëvendësimet.

Por, ka edhe një moment tjetër, që ne duhet të bëjmë dhe ndryshimin e kryetares së AMA-s, pasi sipas këtij raporti lind një interpretim juridik, sepse nuk ka përputhje midis balancës së ligjit të ri që kërkohet. Pra, 3 nga shumica dhe 3 nga pakica e anëtarëve të AMA-s dhe kryetari nga mazhoranca. Ligji i ri përcakton që kryetari i AMA-s do të jetë nga mazhoranca, ndërsa nënkryetari nga pakica. Ata kanë edhe kryetarin, edhe nënkryetarin, nga pakica. Për ta futur në ligjshmëri duhet që bashkë me zëvendësimin e 3 anëtarëve të Këshillit Drejtues të AMA-s të bëhet edhe zëvendësimi i kryetarit, për ta përputhur me ligjin e ri. Në mënyrë që ky institucion të futet ashtu si RTSH në binarët e ligjshmërisë, pasi është duke funksionuar në paligjshmëri.

Gjithashtu, i kërkoj drejtuesve të AMA-s të vazhdojnë detyrën, por duhet të kuptojnë që janë aty thjesht dhe vetëm drejtues në detyrë të institucionit derisa të përfundojë procesi i futjes së drejtimit të këtij institucioni në shtrat ligjor. Që do të thotë se nuk duhet të marrin vendime të rëndësishme dhe vendime të tjera të cilat bien ndesh me ligjin, pasi drejtimi i këtij institucioni është duke u realizuar në paligjshmëri.

Edhe vetë Shërbimi i Monitorimit të Institucioneve të Pavarura na këshillon nëpërmjet raportit që raportet e përfaqësimit në drejtimin e AMA-s duhet të ndryshojnë, pasi nuk mund të jenë – thuhet në raport – edhe kryetari, edhe nënkryetari nga e njëjta forcë politike, siç rezulton aktualisht. Kështu që, është detyra jonë si komision që ta fusim edhe institucionin e AMA-s në binarët ligjorë të funksionimit të tij në të ardhmen”. Na ndiqni dhe në Facebook dhe Twitter

Komunikatë për Shtyp

Dërgo me email | Stampo artikullin