08/10/2013 15:33:14

Gramoz Sako urdheron garden

Nenoficeret te dorezojne armen pas sherbimit

TIRANE- Kreu i Gardës së Republikës, Gramoz Sako, i komanduar nga Ministri i Brendshëm, Saimir Tahiri, ka kërkuar që të gjithë nënoficerët e Gardës së Republikës, pas përfundimit të shërbimit, të dorëzojnë në repartin përkatës armët e tyre, duke i lënë ata të paarmatosur në shtëpitë dhe në kohën e lirë.

Burime brenda Ministrisë së Brendshme pohuan se një urdhër i tillë është dhënë dy ditë më parë dhe se ka nisur të zbatohet që prej ditës së hënë. Sipas burimeve, urdhëri prek një numër shumë të madh punonjësish të Gardës, pasi pjesa më e madhe janë nënoficerë, por ai nuk prek oficerët, të cilët, ashtu sikurse më parë, do të kenë të drejtën e mbajtjes së armës dhe pas përfundimit të shërbimit ditor sipas detyrës.

Ky urdhër i dhënë për dorëzimin e armës nga ana e nënoficerëve të Gardës në fund të orarit të shërbimit është në kuadër të përpjekjeve për të reformuar Gardën, por dhe për të parandaluar përdorimin e armëve të shtetit jashtë orarit nëpër ambiente private. Sakaq, ky urdhër është pjesë e reformës që po realizohet në Gardën e Republikës. Pak ditë më parë edhe vetë ministri i Brendshëm, Sajmir Tahiri, u shpreh se po fillon procesi i reformës më themelore në këtë institucion, ndoshta më i rendësishmi në 85 vjetët e ekzistencës së këtij institucioni.

Garda e Republikës nuk do të ekzistojë më si e tillë dhe brenda 100 ditëve do ketë përfunduar procesi i reformimit dhe modernizimit, për t'i dhënë jetë Drejtorisë së Ruajtjes së Personaliteteve dhe Objekteve të Rëndësisë së Veçantë, e cila nuk do të varet më nga Ministri i Brendshëm, siç ishte deri më sot Garda e Republikës, por do të jetë në zinxhirin e kompetencës dhe përgjegjësisë së Drejtorit të Përgjithshëm të Policisë së Shtetit.

HermesNews-©2013

Dërgo me email | Stampo artikullin