07/10/2013 15:36:21

Ndryshon ligji ''për mbetjet'' pa referendum. Nevojë për riciklim

Në mbledhjen e parë të qeverisë, kabineti i kryesuar nga Kryeministri Edi Rama vendosi për ndalimin e importit të mbetjeve

TIRANE - Komisioni per veprimtarinë prodhuese miratoi sot pa praninë e opozitës ndryshimet në ligjin "Për menaxhimin e integruar të mbetjeve".
Kryetari Eduard Shalsi theksoi nevojën e hapave emergjente që mbetjet të riciklohen. Sipas Shalsit, pas ndërhyrjes së qeverisë në ligjin për mbetjet, nuk është i nevojshëm referendumi i paralajmëruar nga ambientalistët. "Nuk duhet të importoheshin mbetje nga jashtë. Do t’i kërkojmë qeverisë plan emergjent masash që mbetjet të riciklohen", deklaroi Shalsi.

PR/LIGJI PER MBETJET
Në mbledhjen e parë të qeverisë, kabineti i kryesuar nga Kryeministri Edi Rama vendosi për ndalimin e importit të mbetjeve. Në vendim thuhet se qeveria ndalon importin e mbetjeve të rrezikshme dhe jo të rrezikshme në Republikën e Shqipërisë dhe për këtë propozon disa ndryshime në anë ta projektligjit "Për disa ndryshime në ligjin nr. 10463, datë 22.9.2011, "Për menaxhimin e integruar të mbetjeve", të ndryshuar", për shqyrtim dhe miratim në Kuvendin e Republikës së Shqipërisë, sipas tekstit dhe relacionit që i bashkëlidhen këtij vendimi".

Sipas projektligjit bëhen këto ndryshime në ligjin nr. 10463, datë 22.9.2011, "Për menaxhimin e integruar të mbetjeve", të ndryshuar:

Neni 1
Në pikën 3, të nenit 22, fjala "... kufizon ..." shfuqizohet.

Neni 2
Në nenin 48, "Ndalimi i importeve dhe kalimeve transit të mbetjeve", bëhen ndryshimet e mëposhtme: Pika 1formulohet, si më poshtë vijon:
Ndalohet në të gjitha rastet importimi i mbetjeve të rrezikshme dhe jo të rrezikshme në Republikën e Shqipërisë.".
Pika 3 shfuqizohet.

Neni 3
Neni 49, "Importi i mbetjeve jo të rrezikshme", shfuqizohet.

Neni 4
Dispozitë kalimtare
1. Subjektet, të cilat, përpara hyrjes në fuqi të këtij ligji, janë pajisur me autorizim për importimin e mbetjeve jo të rrezikshme, janë të detyruara që, për sasinë e mbetjeve që kanë importuar deri në datën e hyrjes në fuqi të këtij ligji, të përfundojnë procesin e riciklimit, brenda 6 muajve nga data e hyrjes në fuqi të ligjit.
2. Çdo dispozitë ligjore dhe akt nënligjor, që bie në kundërshtim me këtë ligj, shfuqizohen.
3. Ngarkohet Këshilli i Ministrave që, brenda 1 muaji nga hyrja në fuqi e ligjit, të nxjerrë aktet nënligjore, në zbatim të pikave 1 dhe 2, të këtij neni.

Neni 5
Hyrja në fuqi
Ky ligj hyn në fuqi 15 ditë pas botimit në "Fletoren zyrtare". Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin