04/10/2013 11:55:35

Lampeduza, ''masakra e turpit''

Mediat dënojnë masakrën që u krijua në afërsi të ishullit italian

ROMË Shtypi italian dënoi sot në mëngjes masakrën e turpit dhe ''varrezën'' e emigrantëve që u krijua dje në afërsi të ishullit Lampeduza pas mbytjes së një varke që shkaktoi të paktën 130 të vdekur dhe 200 të zhdukur.

"Masakra e Turpit" ishte titulli i së përditshmes së majtë italiane "La Repubblica" sipas së cilës kjo ishte tragjedia më e madhe e klandestinëve në det, me fëmijë e gra shtatzëna mes viktimave.

Mbi një foto ku shfaqen dhjetëra kufoma të mbuluara me çarçafë të gjelbër, e përditshmja i kushtoi tetë faqe tragjedisë që Papa Françesku e quajti masakër turpi.

"Masakra e klandestinëve, Italia në zi" është titulli kryesor i së përditshmes "Corriere della Sera" që ka zgjedhur të mos publikojë foto të kufomave në faqen e parë, por të rreth 150 të mbijetuarve nga 450 deri në 500 eritreas dhe somalezë të cilët ndodheshin në bord të anijes që mori flakë në afërsi të ishullit të vogël në jug të Siçilisë.

Dëshmi të shumta të peshkatarëve që arritën të shpëtonin disa emigrantë mbushën faqet e të përditshmeve italiane, duke përfshirë edhe historinë e një eritreaseje të re që mendohej e vdekur dhe u shpëtua nga një roje bregdetare që kuptoi se ajo merrte ende frymë.

"Sot duhet menduar për të dhënë ndihmë, është një ditë mëshirimi dhe zie. Por sapo të thahen lotët dhe të gjenden kriminelët që jetojnë në kurriz të të dëshpëruarve të tillë duke grumbulluar 500 persona në një varkë prej pak metrash, do të jetë koha e duhur për t'i thënë mjaft këtij fenomeni", thekson analisti i së përditshmes "Corriere della Sera", Gian Antonio Stella.

E përditshmja "La Stampa" titulli kryesor i së cilës është "Kasaphana e Lampeduzës" publikoi në faqe të parë foto familjare të marra prej thasëve dhe veshjeve të klandestinëve ku shfaqeshin çifte të dashuruarish, portrete familjare apo grupe miqsh të qeshur jetët e të cilëve shkuan dëm. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin