03/10/2013 07:33:34

Kapitullimi i Berlusconit si Cezarit

Nga Michèle Leridon

ROMË - Kapitullimi i ish-kryeministrit italian, Silvio Berlusconi, të cilit iu desh t'i bashkohej sot radhës së deputetëve në favor të qeverisë së kryeministrit aktual, Enrico Letta, shënon fundin e një sistemi të denjë për Cezarin në gjirin e të cilit "Cavaliere" ishte i plotfuqishëm, vlerësojnë analistët.

"Shembet një botë e tërë", ishte titulli kryesor i së përditshmes "La Repubblica" përpara manovrës së fundit të Berlusconit. Ky i fundit, pasi nuk arriti të bindte pjesën më të madhe të partisë së tij, bëri thirrje më në fund të votohej në favor të votëbesimit të qeverisë të cilën ai pak më parë dëshironte ta shihte të rrëzuar me çdo kusht. Votëbesim ky, që ekipi i kryeministrit Letta arriti ta fitonte gjerësisht.

Simboli më i fortë i humbjes së influencës së "Cavaliere"-s mbetet revolta e Angelino Alfanos, i cili i detyrohet gjithë karrierën e tij. Që prej kohës kur ishte ministër i Drejtësisë, Alfano hartoi ligje për ta nxjerrë
ish-kryeministrin nga problemet e tij të shumta ligjore. Ai gjithashtu pranoi pa hezitim të zhvendosej nga vendi i parë i listës së zgjedhjeve në shkurt të vitit 2013 ku Silvio Berlusconi e kishte vendosur para se të ndryshonte mendjen e t'i merrte vendin.

Për herë të parë, ky avokat siçilian 42-vjeçar guxoi t'i kundërvihej publikisht mentorit të tij, që prej momentit kur ish-kryeministri e detyroi të hiqte dorë nga posti i zëvendëskryeministrit dhe ministrit të Brendshëm.
Ai kërkoi hapur të votohej në favor të qeverisë që Berlusconi donte të rrëzonte.

"Spartaku dhe revolta e skllevërve", është titulli ironik i së përditshmes së majtë italiane "Il Fatto Quotidiano". Të shumtë janë italianët që mbetën të habitur nga metamorfoza e Alfanos.

Besnikët e përhershëm ndaj "Cavaliere"-s denoncojnë "Brutus"-in e ngjashëm me djalin atvrasës të Cezarit, që sulmon Berlusconin në momentin e dobësimit të tij si pasojë e dënimit me burg. Të tjerë mrekullohen nga pamja e pëllumbit me kthetra fajkoi.

"Është e pabesueshme që Alfano, një krijesë e vërtetë berluskoniane, të dojë të sakrifikojë idhullin e tij", shkruan e përditshmja "Il Messagero". Përtej këtij rasti personal, është një rreth i tërë besnikësh dezertorë. Të martën në mbrëmje, ish-kreu i grupit të partisë "Populli i Lirisë", PDL në Dhomën e Deputetëve, Fabrizio Cicchitto, dikur toger i zellshëm i Berlusconit, e quajti nazist dhe ndjellës të fatit të keq një besnik të "Cavaliere"-s.

"Roma po bëhet dëshmitare e aktit të fundit të historisë politike të Silvio Berlusconit, i cili takoi për herë të parë dikë që i tha jo", shkruan gazetari, Gianni Riotta i së përditshmes "La Stampa". "Sot lindi partia post-Berlusconi. Kemi arritur në kapitullin e fundit të jetës së tij politike", thekson Giacomo Marramao, profesor i shkencave politike në Romë.

"Ai nuk e ka më kontrollin e plotë të partisë së tij, por ka ende shumë peshë", shprehet James Walston, profesor i marrëdhënieve ndërkombëtare në Universitetin Amerikan të Romës.

Shumë të përditshme italiane nuk hezitojnë të rikujtojnë 25 korrikun e vitit 1943, kur Benito Mussolini u rrëzua nga një votim i Këshillit të Madh Fashist.
"Ashtu si Mussolini i atëhershëm, Berlusconi tregon shenja lodhjeje", shkruan Filippo Ceccarelli gazetar i "La Repubblica"-s.

Që prej hyrjes së tij në jetën politike italiane në vitin 1994, manjati i mediave mbretëroi në mënyrë të padiskutueshme në partinë e tij të themeluar me pjesëmarrjen e disa kuadrove të perandorisë së tij mediatike "Fininvest".

"Ai nuk është një drejtues politik, është pronari i partisë dhe kuadrove të tij", u shpreh kohët e fundit një deputet i majtë për ish-kryeministrin. Silvio Berlusconi që figuron mes më personave më të pasur në Itali, me një pasuri prej rreth gjashtë miliardë eurosh, nuk e fshehu kurrë bujarinë ndaj burrave e grave që e rrethonin. Ai ndodhet nën shënjestrën e drejtësisë nën akuzën e blerjes së votave të një senatori të majtë, duke provokuar kështu rrëzimin e qeverisë së Romano Prodit në vitin 2008.

Përkundrazi, përmes tre stacioneve të tij televizive dhe të përditshmes "Il Giornale" që i përket familjes së tij, Silvio Berlusconi ka ditur gjithmonë t'i dekurajojë kritikuesit e autoriteteve.

"Kujtojmë rastin e ish-aleatit të tij, Gianfranco Fini që guxoi t'i kundërvihej duke u bërë viktimë e pushtetit të tij të madh ekonomik dhe mediatik", nënvizon Antonio Polito, analist i së përditshmes "Corriere della Sera".

"Sot, 77 vjeçari Silvio Berlusconi përngjan me hijen e vetvetes", shprehet gazetari Stefano Folli i së përditshmes ekonomike "Il Sole 24 Ore". Megjithatë, deri tani Silvio Berlusconi është deklaruar i vdekur shumë herë në jetën politike, përpara se të ringjallej sërish.

Pasi iu desh të braktiste pushtetin në nëntor të vitit 2011 për shkak të skandaleve në një Itali në prag të falimentimit, ai bëri një rikthim spektakolar, duke rrëmbyer një të tretën e votave në zgjedhjet e shkurtit. "Unë nuk vdes, edhe po të më vrasin", deklaroi ai gjatë një interviste për të përditshmen "Panorama" këtë javë. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin