01/10/2013 15:12:12

T'a mundësh pleqërinë duke punuar

Durrës, në ditën e të moshuarve

DURRES - 110 të moshuar kanë marrë sot urimet për një pleqëri të mbarë nga nxënësit e shkollës Marie Kaçulini në Durrës. Të moshuarit frekuentojnë çdo ditë Qendrën e tyre që financohet nga bashkia dhe prej disa vitesh kanë gjetur një mundësi më shumë për të kaluar disa orë ndryshe në shoqërinë e njëri tjetrit dhe në kujdesin e punonjësve socialë, tha Dorian Hatibi, drejtor i kësaj Qëndre.

Ata vijnë nga përvoja të ndryshme dhe një pjesë e mirë kanë nevojë edhe për shërbime të specializuara, ndërsa mjaft të tjerë janë vitalë dhe në Qendër gjejnë mundësinë për t'u marrë me diçka ndryshe.Thuajse të gjithë janë pensionistë, por shumat që marrin në fund të muajit jo gjithmonë mjaftojnë për kërkesat e shumta që ka një i moshuar. Nga ana tjetër asnjë prej tyre nuk ka mundësi të punojë me orë të zgjatura.

"Nuk do të më pëlqente të përfundoj në një azil, apo qoftë edhe në një Qendër për të moshuar", thotë Palushi, i cili sapo ka festuar 80-vjetorin. Që nga dita që ka dalë në pension në moshën 60-vjeçare ka punuar rregullisht. Edhe tani menaxhon një biznes tregtar, në një nga dyqanet e tregut të ri, pranë Kishës Katolike. "Dal në ora 06.00. Rregulloj mallin nëpër tezga.

Punoj pa ndërprerje deri në 2 pasdreke, atëhere kur edhe tregu mbyllet dhe nuk ka më klientë", më tregon, ndërsa jemi prezantuar vetëm pak minuta më parë. "Çfarë tregtoni - e pyes. Kryesisht konfeksione, tuta, rroba fëmijësh e të rriturish, gjithçka". I tregoj se sot është Dita Botërore e të Moshuarve. "Është mirë kur shteti dhe shoqëria kujdesen për të moshuarit, por unë them se shumë më tepër duhet të bëjë familja", thotë Palushi, i cili e quan veten me fat që mund të punojë edhe në këtë mosha.

Një nga ata që është rreshtuar me familjen në krye të një biznesi është Pëllumb Zëra, 75 vjeç. Ai del çdo ditë në mëngjes herët dhe bashkë me djalin dhe nusen përgatisin gjellët për restorantin e tyre në afërsi të stacionit të autobuzëve.

"Djemtë e drejtojnë gjelltoren, por unë u jap një dorë, deri nga ora 13.00, pastaj shkoj dhe pushoj", thote ai. Thuajse të njejtën gjë bëjnë sa i përket orarit edhe dy intelektualë të shquar të qytetit, njëri mjek dhe tjetri përkthyes, të cilët nuk heqin dorë nga leximi e të shkruarit.

Dr. Ali Sula, që po i drejtohet 90 vjetëve para disa muajsh promovoi librin e tij "Sistemi shëndetesor në rrethin e Durrësit gjatë shekullit të 20-të". Një punë e gjatë studimore, për të cilën iu desh të qëmtojë në arkivat e qytetit dhe të kryeqytetit. Edhe Gjergj Vlashi, regjisor, shkrimtar dhe përkthyes i njohur, i ka mundur 85 vitet e tij duke punuar intensivisht.

"Kujdesem për shëndetin, por pa i lënë pas dore shëtitjen dhe veçanërisht, punën", thotë regjisori i njohur, i cili qëndron disa orë në tavolinën e punës. Dita e të Moshuarve festohet që nga viti 1991 dhe synon ndërgjegjësimin e njerëzve për çështjet që i prekin të moshuarit. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin