28/09/2013 08:28:58

FMN, masa të dhimbshme për Shqipërinë: ndërhyrje në skemën e pensioneve

Sipas qeverisë dhe FMN-së veç borxhit zyrtar, shteti ka dhe L50 mld të tjera detyrime të prapambetura ndaj privatëve. A do të ketë shkurtime të shpenzimeve qeveritare ?

TIRANE - Ministri i Financave, Shkëlqim Cani tha se "...e vetmja zgjidhje është thyerja e kufirit të defiçitit të borxhit publik, meqë paratë janë harxhuar ndjeshëm në 8 muajt e parë të vitit. Nevojiten rreth 24 miliardë lekë borxh shtesë në 2013, ndaj borxhi publik i pritshëm nuk do të jetë 64% saç ishte zotimi i qeverisë së mëparshme, por diçka mbi 67%", deklaroi Cani.

Sipas qeverisë dhe FMN-së veç borxhit zyrtar, shteti ka dhe L50 mld të tjera detyrime të prapambetura ndaj privatëve.

"Nëse do të përfshijmë detyrimet e prapambetura, borxhi e kalon shifrën e 70%. Është një situatë me çekuilibra të thellë makro-ekonomikë në një kohë kur mjedisi ekonomik është i dobët", tha përfaqësuesi i FMN-së.

Kriza e financave rëndohet nga ngadalësimi i fortë i rritjes ekonomike. Për këtë vit Ministria e Financave dhe FMN llogarisin se prodhimi kombëtar do të rritet me 1.7-1.9 për qind.

"Presim që rritja vitin tjetër të jetë paksa më e mirë, në 2-2,3%, por edhe kjo do të varet shumë nga veprimet e qeverisë", shtoi Nadeem Ilahi, shefi i misionit të FMN-së.

Kërcimi i borxhit në nivele kritike dhe pamundësia për ta zbutur atë përmes rritjes ekonomike, sipas “FMN”-së i imponon Shqipërisë masa të dhimbshme.

“Është e qartë që ka nevojë për një axhustim të ndjeshëm fiskal që kërkon rritjen e të ardhurave nga taksat. Ne kemi diskutuar me qeverinë opisionet e ndryshme se si këto të ardhura mund të rriten. Cilat taksa duhet të ndryshojnë. i morëm të gjitha taksat një nga një për të parë se çfarë mund të bëhet me normat e secilës taksë dhe se çfarë impakti kanë ato tek të ardhurat. Për atë se çfarë do të rekomandonim ne, do t’ia lëmë në dorë ministrit të përgjigjet se cila është taksa e tij e preferuar", shtoi Ilahi.

Rivënia e borxhit nën kontroll do të kërkojë sakrifica dhe në kahun e shpenzimeve, posaçërisht në skemën e pensioneve. Lajmi i mire është se Qeveria do t'u qëndrojë premtimeve elektorale. Prioritet kryesor mbetet ai i shlyerjes së detyrimeve të prapambetura për të cilat nuk përjashtoi edhe marrjen e një kredie nga FMN apo Banka Botërore. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin