27/09/2013 13:01:27

Franca del nga recesioni: rritje 0.5 %

Investimet që sipas ekonomistëve përbëjnë treguesin e vërtetë të rimëkëmbjes ekonomike vazhduan rënien gjatë tremujorit të dytë

PARIS - Ekonomia franceze doli përfundimisht nga recesioni me një rritje prej 0,5 për qind të produktit të brendshëm bruto gjatë tremujorit të dytë të vitit 2013 pas dy tremujorëve që shënuan rënie, bëri sot të ditur instituti francez i statistikave INSEE. Instituti i Statistikave dhe Studimeve Ekonomike rishikoi gjithashtu shifrën e deklaruar gjatë tremujorit të parë gjatë të cilit PBB pësoi një rënie 0,1 për qind dhe jo 0,2 për qind, sipas shifrës së publikuar fillimisht. Investimet që sipas ekonomistëve përbëjnë treguesin e vërtetë të rimëkëmbjes ekonomike vazhduan rënien gjatë tremujorit të dytë. Ato pësuan një ulje prej 0,4 për qind. "Rritja e fuqisë blerëse individuale dhe familjare, në qendër të debateve të shumta politike, u ngadalësua gjatë tremujorit të dytë në nivelin 0,4 për qind në raport me nivelin 0,8 për qind të regjistruar në fillim të vitit", deklaroi sot INSEE. "Megjithatë niveli i konsumit familjar u rrit me 0,4 për qind ndërsa shpenzimet publike me 0,7 për qind duke u kthyer kështu në motorin e rritjes ekonomike gjatë pranverës", citon më tej raporti i institutit. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin