27/09/2013 12:56:15

Lirohet bregdeti në Sarandë

Policia, operacione dhe arrestime për të liruar hapësirat e zëna

SARANDË - Përgjatë bregdetit të qytetit të Sarandës, nga zona e Marinës në Kanalin e Çukës, në afërsi të vijës së ujit, janë konstatuar dhe dokumentuar 53 ndërtime pa leje, objekte të ndërtuara me beton, mole të mbushura me inerte, ndarje të betonuara deri në thellësi të ujit.

Drejtori i INUK-ut në Sarandë, ing. Zenel Seitaj, pohon se ky evidentim është bërë gjatë një azhornimi të përbashkët me inspektorët e inspektoriatit të bashkisë. Pas evidentimit është bërë dhe dokumentimi i plotë, si dhe gjobitja për subjektet.

Situata në pjesën tjetër të bregdetit është nën kontroll të drejtuesve vendorë. Nga Borshi në Sarandë, në administrimin e komunës Lukovë janë konstatuar 37 objekte pa leje, nga të cilat 20 në zonën bregdetare.

Për situatën në Komunën e Ksamilit, ku një shtetas u arrestua nga policia për dëmtimin e ishullit me betonizim dhe ngritje të një lokali në faqen e gërmuar, ing Seitaj konfirmon se hetimet e Prokurorisë kanë përfshirë dhe aktet zyrtare të përpiluara që në muajin prill për evidentimin, gjobitjen dhe vendimin e prishjes së ndërtimit në ishull.

Sipas drejorit të INUK Sarandë, bashkëpunimi mes strukturave lokale dhe vendimmarrja përfundimtare nga drejtuesit lokalë duhet të respektojnë afatet ligjore, 10 ditë pas verifikimit dhe klasifikimit “ndërtim pa leje” vendorët duhet të plotësojnë dokumentacionin me vendimin e prishjes.

Sipas tij, situtata është nën kontroll verifikimi për çdo rast përfshin edhe ndërtimet buzë rrugëve kryesore në akset hyrëse dhe dalëse të komunave dhe bashkive. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin