23/09/2013 16:04:15

Tahiri fillon me rrugorët. Korrupsioni: shkarkon 80 % të efektivave

Kontrolli i brëndshëm jep rrezultatet e shkeljeve

TIRANË - Rreth 80 % e efektivave të policisë rrugore shkarkohen nga puna me urdhër të Ministrit të brendshëm Sajmir Tahiri, pas kontrollit të brendshëm dhe një hetim të gjerë për ligjshmërinë dhe proçedurat standarte gjatë kryerjes së detyrës.

Specialistët panë shkelje të rënda në ushtrimin e detyrave funksionale dhe akte abuzive me dokumentacionin nga 11 oficerë dhe 77 policë të rolit bazë, të cilët janë larguar nga Komisariati i qarkullimit rrugor Tiranë dhe janë vënë në dispozicion të Drejtorisë së personelit.

Ndër shkeljet e konstatuara, në 28 raste të vendimeve të komisionit të shqyrtimit të kundravajtjeve administrative mungonin lejet e drejtimit të shtetasve, të cilat ishin brenda afatit të bllokimit.

Disa kundravajtës janë gjobitur përsëri për shkelje të rregullave të qarkullimit rrugor, gjatë kohës që lejet e drejtimit të këtyre shtetasve duhet të ishin të bllokuara me vendim komisioni.

Rezultuan mangësi në mënyrën e plotësimit të proçesverbaleve të konstatimit të shkeljeve (gjobave). Konkretisht në mjaft raste janë tërhequr dokumentet e automjeteve si mënyrë presioni për të garantuar pagesa abuzive në kundërshtim me Kodin Rrugor.

Nga punonjësit e rolit drejtues gjatë kësaj periudhe nuk është marrë asnjë masë administrative ndaj shkeljeve të punonjësve të Qarkullimit Rrugor, për mënyrën e plotësimit të proçesverbaleve të konstatimit të shkeljeve, e cila konsiderohet shkelje e rëndë disiplinore.

Përveç masave administrative, për 4 oficerë të rolit nivelit drejtues dhe 1 oficer të rolit zbatues janë referuar materialet në prokurori për veprat penale të "Shpërdorimit të detyrës” dhe "Korrupsionit pasiv të personave që ushtrojnë funksione publike".

Po sot Ministri i Brendshëm ka urdhëruar anulimin e tenderit për "Shërbim transporti karoatreci, parking, ruajtje automjetesh" si dhe kontratën e nënshkruar për zbatimin e këtij tenderi nga ana e Njësisë Rajonale të Policisë Rrugore Tiranë me një subjekt privat.

Ky vendim ka ardhur pas shqyrtimit të hollësishëm të procedurave të ndjekura për realizimin e tenderit dhe vënien e tij në zbatim. Nga ky shqyrtim kanë rezultuar shkelje të shumta procedurale dhe ligjore si, tenderi nuk duhej të zhvillohej nga Komisariati i qarkullimit rrugor të Tiranës, pasi nuk ka kapacitetet e duhura për të realizuar këtë proçedurë. Tenderët analogë për të njëjtin shërbim në qarqet e tjera janë kryer nga Drejtoria e Përgjithshme e Policisë.

Afati i kontratës së tenderit të shërbimeve nuk mund të shtrihet në 5 vjet, ndërkohë që është vendosur një vlerë e kontratës, në një kohë kur pagesa e firmës do të bëhet sipas të adhurave të realizuara nga shërbimi.

Është konstatuar shkelje me pagesen nga buxheti i shtetit të detyrimeve ndaj firmës. Çmimi i shërbimit të transportit është 4000 lekë, pra më i lartë se gjobat për kundravajtje administrative që është akt juridik, prandaj në këto kushte Ministri i Brendshëm ka urdhëruar anulimin e tenderit si dhe procedimin penal të zyrtarëve përgjegjës për këto shkelje ligjore. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin