19/09/2013 15:30:28

Policia rrit ndërhyrjet në flagrancë

Në 48 orë, 24 raste dhune: policia ka arrestuar në flagrancë 6 persona, të cilët kishin ushtruar dhunë psikike dhe fizike ndaj bashkëshorteve të tyre, ndërsa 3 persona të tjerë po ndiqen penalisht në gjendje të lirë

TIRANË - Policia e Shtetit po i kushton një vëmendje të veçantë fenomenit të dhunës në familje, duke rritur aktivitetin parandalues, nëpërmjet trajtimit me seriozitet të veçantë të këtij fenomeni në të gjitha rastet kur ai shfaqet.

Ministria e Brendshme bën të ditur se vetëm gjatë 48 orëve të fundit shërbimet e policisë kanë ndërhyrë në 29 raste të dhunës në familje apo shkeljes së urdhrave të mbrojtjes në të gjithë vendin.

Policia ka arrestuar në flagrancë 6 persona, të cilët kishin ushtruar dhunë psikike dhe fizike ndaj bashkëshorteve të tyre, ndërsa 3 persona të tjerë po ndiqen penalisht në gjendje të lirë.

Dy persona u kapën pasi ishin shpallur në kërkim për shkelje të Urdhrit të Mbrojtjes, ndërkohë që një tjetër është shpallur në kërkim për të njëjtën vepër penale.

Në 22 raste dhuna është ushtruar ndaj bashkëshortëve, ndërsa në 7 raste ndaj prindërve apo pjesëtarëve të tjerë të familjes. Policia ka plotësuar vetëm gjatë 48 orëve të fundit 19 kërkesë-padi për lëshime të urdhrave të mbrojtjes sipas kërkesave të bëra nga familjarët e dëmtuar.

Policia e Shtetit do të vijojë të ketë në mënyrë të veçantë në fokusin e punës së saj fenomenin e dhunës në familje, për të neutralizuar këtë fenomen që në nisje të tij, pa u lënë hapësirë situatave për të kaluar në ngjarje më të rënda dhe me pasoja për jetën e familjarëve. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin