19/09/2013 12:43:57

Rama, nuk mund të mbështetemi tek borxhi, na duhen burime

Borxhi ndaj privateve do të jetë prioritet i qeverisjes

TIRANË - Kryeministri Edi Rama, gjatë fjalës së tij në konferencën "Perspektivat e Biznesit në Europën Juglindore", që u mbajt sot në Tiranë, deklaroi se qeveria e re po përgatitet të shlyejë borxhin që shteti ka ndaj sektorit privat.
Kreu i qeverisë bëri të ditur se "po përgatitemi të shlyejmë një orë e më parë borxhin që rëndon në kurriz të sektorit privat dhe kompanive që po asfiksohen. Do të shlyejmë borxhin me çfarë çdo kostoje".

Rama gjithashtu tha se "do t’i përmbahet angazhimit për kryerje të auditimit të sistemit të administrimit të parasë dhe shpenzimeve në të gjitha drejtimet", shërbim ky, që sipas tij, do të kryhet nga 4 prej kompanvie më të mëdha të auditimit në botë. Kryeministri Rama foli për një tjetërsim të sjelljes së shtetit ndaj ekonomisë. "Ne do të vendosim shtetin në shërbim të ekonomisë dhe jo ekonominë në shërbim të shtetit", u angazhua ai.

Në strategjinë e qeverisë së re, ndër pikat kyçe, mbi të cilat do të bazohet reformimi i ekonomisë, sipas Ramës, janë "nxitja e investimeve të brendshme dhe të huaja, rivlerësimi i mënyrës së përdorimit të burimeve natyrore, përqendrimi tek një mënyrë e re e përdorimit të parasë publike, masa për rritjen e kreditimit nga sektori bankar, politika specifike për punësimin, e lidhur ngushtë kjo me politikat e rikualifikimit profesional dhe të përshtatjes me tregun".

Rama u shpreh se synimi i qeverisë së tij është ndërtimi i një ekonomie që na afron çdo ditë e më shumë me ekonominë europiane dhe shtoi se "Kemi nevojë për një ndryshim të strukturës dhe burimeve ekonomike, nuk mund të mbështetemi tek borxhi". Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin