13/09/2013 17:23:16

Rama fillon bashkëqeverisjen me ''Shqipërinë e vogël''

Strategjia e Qeverisë së re. Takim një herë në gjashtë muaj mes dy qeverive. Bashkëpunime në arsim dhe ekonomi. Të ndryshojmë imazhim e rajonit. Dy zëra bashkë dëgjohen më fort në Bruksel. Bashkimi doganor ? Rama, gati grupi i punës

PRISHTINE - Nuk ka qenë vetëm vizitë kortezie ajo Kryeministrit Edi Rama në Kosovë. Kreu i qeverisë vendosi themelet për një bashkëqeverisje strategjike me qeverinë e Kosovës.

Në konferencën për shtyp me homologun Hashim Thaçi, Rama deklaroi se në muajin nëntor "kemi rënë dakord që të bëjmë mbledhjen e parë të përbashkët të qeverive dhe të fillojmë bashkëqeverisjen strategjike mes Shqipërisë e Kosovës...objektivat e detyrat janë të përcaktuara në mbledhjen e përbashkët të të dy qeverive dhe çdo ministër duhet të japë llogari përpara dy qeverive në mënyrë periodike për ecurinë e projekteve dhe detyrave të lëna bashkarisht", tha Kreu i Ekzekutivit.

"Dua të nënvizoj ambicjen tonë të përbashkët për të mos mbetur vetëm në dëgjim me Brukselin, por edhe për të qënë proaktivë në paraqitjen e projekteve të besueshme të zhvillimit, jo vetëm mes nesh, por edhe me fqinjët", deklaroi Kryeministri Rama, pa harruar njohjet e reja.

Kreu i ekzekutivit Hashim Thaci informoi Ramën, "mbi domosdoshmërinë e njohjeve të reja të Kosovës. Kam besim të plotë se kryeministri Rama dhe Ministria e Jashtme shqiptare do të luajë një rol të rëndësishëm", tha ai.

Për t'iu rikthyer bashkëqeverisjes strategjike, kur foli në Kuvendin e Kosovës, Rama u ndal edhe në projektin TAP. Ai vlerësoi rolin e ish kryeministrit përsa i takon projektit, por siguroi se "...do të shkojmë edhe më tutje, duke bërë çdo përpjekje që kjo linjë strategjike gazi, që do të kalojë edhe nëpër Shqipëri për t'u ngjitur lart në Mal të Zi, Kroaci e më tej, të ketë me patjetër edhe një degëzim në Kosovë", deklaroi Kryeministri Rama.

Unifikimi i sistemin arsimor dhe strategjia e përbashkët për shfrytëzimin e potencialeve që ka hapësira shqiptare, me koordimin e të dy shteteve do të sillte shpërndarjen rajonale të prodhimit, zgjerim të rrugëve të prodhimit dhe rritje të të ardhurave nga prodhimi këtej dhe andej kufirit, sipas kryeministrit Rama, i cili premton se do i'i japë fund patatefobisë në rajon, që ka shkaktuar luftëra doganore në kufi.

Kryeministri i shqipëtarëve shkon dhe më tej, "jemi të gatshëm të realizojmë bashkimin doganor. E di që nuk është e lehtë, por do të ngrejmë një grup të përbashkët me qëllim që t’i japim një përmasë të madhe lirie dhe konkurrence biznesit shqiptar në të gjithë hapësirën shqiptare", tha Rama. //HermesNews - ©2013//

Doriana Metollari

Dërgo me email | Stampo artikullin