12/09/2013 12:53:42

Azem Hajdari prehet në Varrezat e Dëshmorëve

Zhvillohet ceremonia e rivarrimit

TIRANË - Azem Hajdari, Heroi i Demokracisë (foto), u shoqërua sot në varrezat e Dëshmorëve të Kombit, përmes një ceremonie të organizuar nga Bashkia e Tiranës, në 15 vjetorin e vrasjes së tij.

Për më shumë se dy orë në Pallatin e Kongreseve, qindra simpatizantë, të afërm, miq e politikanë, bënë nderimet e fundit për Azem Hajdarin. Në homazhe morën pjesë personalitete të larta të jetës politike, Presidenti i Republikës, Bujar Nishani, Kryetari i parlamentit, Ilir Meta, ministra të qeverisë Rama, kryetarë të partive politike në vend, Ambasadorë të akredituar në vendin tonë, si dhe studentë të dhjetorit ‘90, intelektualë, nismëtarë të lëvizjes për demokraci, miq, shokë dhe kolegë të Azem Hajdarit.

Në një prononcim për mediat Kryetari i Parlamentit dhe kreu i LSI, Ilir Meta, tha se "kujtimi i Azem Hajdarit do të jetë i paharrueshëm dhe njëkohësisht një ditë e angazhimit për të ardhmen për të plotësuar ëndrrën e tij që Shqipëria të jetë si e gjithë Europa. Ne do të na duhet të tregojmë më shumë urtësi dhe përgjegjshmëri që ëndrra e tij dhe e gjeneratës së tij të bëhet realitet sa më shpejt”.

Më tej rreth orës 12:30 kortezhi i përmortshëm me arkivolin e vendosur në shtratin e topit, u nis për në Varrezat e Dëshmorëve, ku u zhvillua dhe ceremonia e rivarrimit. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin